भारतीय वनडे संघाचा पूर्णवेळ कर्णधार रोहित शर्मा (Rohit Sharma) आपल्या पहिल्या मालिकेसाठी सज्ज झाला आहे. दक्षिण आफ्रिका दौऱ्यापूर्वी पायाचा स्नायू दुखावल्यामुळे तो संपूर्ण दौऱ्यालाच मुकला होता. याच दौऱ्यावर वनडे मालिकेवेळी तो आपल्या पूर्णवेळ कर्णधारपदाची सूत्रे हातात घेणार होता. मात्र आता तो वेस्ट इंडीज (India vs West Indies) बरोबरच्या वनडे मालिकेत तो भारताचे नेतृत्व करताना दिसेल. दरम्यान, वेस्ट इंडीज बरोबरची वनडे मालिका सुरू होण्यापूर्वी त्याने सोशल मीडियावर एक पोस्ट केली आहे. ही पोस्ट सध्या चांगलीच व्हायरल होत आहे. (Captain Rohit Sharma Instagram post before first ODI series as a full time captain)

रोहित शर्माने आपल्या इन्स्टाग्राम (Instagram) अकाऊंटवर आपला पाठमोरा फोटो शेअर केला. आणि त्याला 'आता सुरूवात करण्यासाठी आतूर आहे.' असे कॅप्शन दिले. रोहित शर्माची पूर्णवेळ कर्णधार म्हणून पहिली वनडे मालिका असणार आहे. विराट कोहलीने टी २० वर्ल्डकप पूर्वी आपले टी २० मधील कर्णधारपद सोडले होते. त्यानंतर बीसीसीआयने विराट कोहलीला दक्षिण आफ्रिका दौऱ्यापूर्वी वनडे संघाच्या कर्णधारपदावरून हटवत रोहितला कर्णधार केले होते.

त्यानंतर विराट कोहलीने दक्षिण आफ्रिकेविरूद्धची कसोटी मालिका हरल्यानंतर कसोटी संघाचे कर्णधारपदही सोडले. बीसीसीआयने कसोटी संघाच्या कर्णधारपदाबाबत अजून कोणताही निर्णय घेतलेला नाही. मात्र चर्चेत रोहित शर्माचे नाव आघाडीवर आहे.