ओस्लो : बुद्धिबळ विश्वविजेता ग्रँडमास्टर मॅग्नस कार्लसन याने अमेरिकन ग्रँडमास्टर हॅन्स निमनवर सामना खेळताना फसवणूक केल्याचा आरोप केला आहे. आपल्या ट्विटर अकाऊंटवरून त्याने आपण हॅन्स निमनविरुद्ध माघार का घेतली याचा खुलासा केला आहे. तसेच आगामी काळात फसवणूक करणाऱ्या खेळाडूविरुद्ध आता कधीच खेळू इच्छित नाही, असेदेखील कार्लसन याने म्हटले आहे.

सेंट लुईस येथे सप्टेंबर महिन्याच्या सुरुवातीला झालेल्या ‘सिंकफिल्ड कपमध्ये’ हॅन्स निमनविरुद्ध पराभवाचा धक्का बसल्यावर कार्लसने स्पर्धा अर्ध्यावर सोडली होती. त्यानंतर ‘ज्युलियस बेअर जनरेशन’ स्पर्धेत निमनविरुद्धच खेळताना फक्त एकच चाल खेळून त्याने सामना अर्धवट सोडला होता; या दोन घटनांमुळे मॅग्नस कार्लसन चेस जगतात चांगलाच चर्चेत आला होता.

हॅन्स निमनच्या फसवणुकीने खेळ करायच्या मुद्द्यावर मॅग्नस कार्लसन म्हणाला, की ‘‘आमच्यात सिंकफिल्ड कपमध्ये झालेल्या सामन्यातच मला निमन फसवणुकीने खेळतो याचा संशय आला होता.’’ ‘हॅन्स निमनने आपण १२ आणि १६ वर्षांचे असताना अप्रामाणिक खेळ करून समोरच्या खेळाडूची फसवणूक केल्याचे नुकतेच कबूल केले होते.’ हॅन्स निमनने ऑनलाईन पद्धतीने खेळवण्यात आलेल्या बुद्धिबळ स्पर्धेत अप्रामाणिकपणे खेळ केल्याचे कबूल केले आहे; मात्र निमन प्रत्यक्ष पटावर खेळवल्या जाणाऱ्या सामन्यात कशाप्रकारे अप्रामाणिक खेळ करेल याचा पुरावा कार्लसनने दिला नाहीय.

‘एलो’ गुणांच्या बाबतीत अमेरिकेचा निमन हा मॅग्नस कार्लसन पेक्षा २०० गुणांनी मागे आहे. कार्लसनने जगातील विविध बुद्धिबळ स्पर्धांच्या संयोजकांना आणि जागतिक बुद्धिबळ संघटनेला अप्रामाणिक खेळ करणाऱ्यांना रोखले जावे’’ अशी विंनती केली आहे.