टोरंटो : भारताचा युवा खेळाडू डी. गुकेश याने शनिवारी मध्यरात्री झालेल्या आव्हानवीरांच्या बुद्धिबळ स्पर्धेतील लढतीत भारताच्याच विदित गुजराथी याच्यावर मात करीत गुणतालिकेत पुन्हा एकदा अव्वल स्थानावर झेप घेतली. गुकेश आता पाच गुणांसह इयान नेपोनियात्ची याच्यासह संयुक्तपणे पहिल्या स्थानावर विराजमान आहे.

डी. गुकेश - विदित गुजराथी यांच्यामधील आठव्या फेरीची लढत ३८ चालींनंतर संपली. गुकेशने या लढतीत वर्चस्व राखले. या लढतीत केलेल्या खेळाबद्दल गुकेशने समाधान व्यक्त केले. आर. प्रज्ञानंद - एलिरेझा फिरॉझा यांच्यामधील लढत ड्रॉ राहिली. प्रज्ञानंदने आठ सामन्यांमधून ४.५ गुणांची कमाई केली आहे.

नेपोनियात्चीने संधी गमावली

इयान नेपोनियात्ची याच्याकडे आठव्या फेरीच्या सामन्यात विजयाची संधी होती. या फेरीत त्याने निजात एबासोव याचा सामना केला. एबासोव या मालिकेत सध्या तळाला आहे. त्यामुळे त्याच्याविरुद्ध विजय मिळवणे गरजेचे होते. पण सुरुवातीलाच नेपोनियात्ची याच्याकडून चूक घडली. याचा फायदा एबासोव याने घेतला. ही लढत ड्रॉ राखण्यात त्याला यश मिळाले.

हिकारू नाकामुराचा विजय

दिग्गज खेळाडू हिकारू नाकामुरा याने या स्पर्धेतील आठव्या फेरीत झोकात पुनरागमन केले. त्याने शनिवारी झालेल्या लढतीत फॅबियानो कॅरुअना याच्यावर मात केली. यामुळे त्याला ४.५ गुणांची कमाई करता आली आहे. डी. गुकेश व इयान नेपोनियात्ची यांच्यानंतर गुणतालिकेत त्याचा क्रमांक आहे.

महिला विभागात चुरस

महिला विभागात चुरस निर्माण झाली आहे. लेई टिंगजी, ॲलेक्झँड्रा जी. व टॅन झोंगयी या तीन महिला खेळाडूंनी प्रत्येकी पाच गुणांची कमाई केली आहे. या स्पर्धेच्या आठ फेऱ्या अद्याप बाकी आहेत. दरम्यान, कोनेरू हम्पी हिने आर. वैशालीला पराभूत केले. हम्पीने ३.५ गुणांची कमाई केली असून वैशालीला २.५ गुणांवरच समाधान मानावे लागले आहे.

ताजी गुणतालिका (पुरुष विभा) ः १) डी. गुकेश (५ गुण) २) इयान नेपोनियात्ची (५ गुण) ३) हिकारू नाकामुरा (४.५ गुण) ४) आर. प्रज्ञानंद (४.५ गुण) ५) फॅबियानो कॅरुअना (४ गुण) ६) विदित गुजराथी (३.५ गुण) ७) एलिरेझा फिरॉझा (३ गुण) ८) निजात एबासोव (२.५ गुण).