Chess Olympiad : तामिळनाडूचे सीएम स्टॅलिन (MK Stalin) यांनी बुद्धीबळ ऑलिम्पियाडमध्ये पदक जिंकणाऱ्या प्रत्येक खेळाडूला प्रत्येकी एक कोटी रूपयाचे बक्षीस जाहीर केले. चेन्नईमध्ये झालेल्या 44 व्या चेस ऑलिम्पियाडमध्ये भारतीय पुरूष ब संघाने कांस्य तर महिला अ संघाने देखील कांस्य पदक पटकावले. महिला संघाने पहिल्यांदाच चेस ऑलिम्पियाडमध्ये पदकाला गवसणी घातली. भारतीय महिला संघाचे नेतृत्व भारताची अनुभवी ग्रँडमास्टर हम्पीने केले होते.

चेन्नईमध्ये पार पडलेल्या 44 व्या चेस ऑलिम्पियाड स्पर्धेत भारतीय पुरूषांच्या ब संघाने कांस्य पदक पटकावले. भारतीय खुल्या संघात प्रज्ञानंदना, गुकेश, निहाल, रौनक आणि अधिबान यांचा समावेश होता. याचबरोबर भारताने महिला गटात पहिल्यांदा कांस्य पदक पटकावले. भारतीय महिला अ संघाने ही कामगिरी केली.

खुल्या गटात भारताच्या पुरूष ब संघाने अंतिम फेरीत जर्मनीचा 3 - 1 असा पराभव करत कांस्य पदकावर नाव कोरले. भारतीय ब संघ तिसऱ्या क्रमांकावर राहिला. उझबेकिस्तानने नेदरलँडचा 2 - 1 असा पारभव करत सुवर्ण पदक पटकावले. तर बुद्धीबळात दबदाबा असलेल्या अमेरिकेने खुल्या गटाचा अंतिम फेरीत स्पेनचा 2.5 - 1.5 असा पराभव केला.

भारताचा टॉप सिडेड महिला अ संघाला 11 व्या तसेच अंतिम फेरीत अमेरिकेकडून 3 - 1 असा पराभव सहन करावा लागला. त्यामुळे त्यांना सुवर्ण पदकापासून वंचित रहावे लागले. अंतिम फेरीत कोनेरू हम्पीच्या नेतृत्वातील भारतीय महिला अ संघ तिसऱ्या स्थानावर राहिला. त्यामुळे त्यांना कांस्य पदकावर समाधान मानावे लागले.