चेंग्दू : यजमान चीनने जपानचा ३-० असा उपांत्य फेरीत पराभव करून उबेर करंडक बॅडमिंटन स्पर्धेत अंतिम फेरी गाठली. विजेतेपदासाठी त्यांचा सामना इंडोनेशियाविरुद्ध होईल. एकेरीत नावाजलेले खेळाडू असलेल्या इंडोनेशियाने गतविजेत्या दक्षिण कोरियाचे आव्हान ३-२ असे मोडून काढले.

ऑलिम्पिक विजेत्या चेन युफेईने अया ओहोरीला २१-१८, २१-१५ असे सरळ गेममध्ये पराभूत केले, त्याआधी जागतिक क्रमवारीत अव्वल असलेल्या चेन किंगचेन आणि जिया यिफान यांनी दुहेरीत नामी मात्सुयामा आणि चिहारू शिदा यांच्यावर १४-२१, २१-१३, २३-२१ असा पुनरागमन करत विजय मिळवला, त्यामुळे चीनने २-० अशी आघाडी घेतली. त्यानंतर बिंगजियाओने नोझोमी ओकुहाराचा २१-८, २१-१८ असा पराभव करून चीनला अंतिम फेरी गाठून दिली.

२०१६ नंतर चीनचा संघ प्रथमच मायदेशात अंतिम सामना खेळणार आहे. उबेर करंडक स्पर्धेच्या इतिहासात त्यांनी आत्तापर्यंत सर्वाधिक १५ वेळा विजेतेपद मिळवले आहे.