MCA Election : बीसीसीआय अध्यक्षपदाची निवडणूक झाल्यानंतर सर्वांचे लक्ष मुंबई क्रिकेट असोसिएशनच्या निवडणुकीवर लागले आहे. राष्ट्रवादी काँग्रेसचे अध्यक्ष शरद पवार आणि भाजप नेते आशिष शेलार यांच्या पॅनलने हातमिळवणी केल्याने राजकीय दृष्ट्या या निवडणुकीकडे एका वेगळ्या नरजेने पाहिले जात आहे. दरम्यान, आज (दि. 19) शरद पवार - आशिष शेलार यांच्या पॅनलचा प्रचार करण्यासाठी खुद्द मुख्यमंत्री एकनाथ शिंदे आणि उपमुख्यमंत्री देवेंद्र फडवणीस यांनी बैठक घेतली. यावेळी शरद पवार, एकनाथ शिंदे आणि देवेद्र फडणवीस हे महाराष्ट्रातील दिग्गज नेते एकाच व्यासपीठावर बसल्याचे दिसून आले. एमसीएच्या अध्यक्षपदाच्या निवडणुकीत संदीप पाटील आणि अमोल काळे एकमेकांसमोर आहेत.

या बैठकीवेळी मुख्यमंत्री एकनाथ शिंदे यांनी राजकीय बॅटिंग देखील केली. ते म्हणाले की, 'शरद पवारांनी आम्हाला सांगितले की ते करावेच लागते. शरद पवारांनी राज्याचे नेतृत्व केले आहे. केंद्रीय मंत्रीपद देखील भुषवले आहे.' शेजारी बसलेल्या दवेंद्र फडणवीसांकडे पाहून शिंदे म्हणाले की, 'इकडे नागपूर कनेक्शन देखील आहे. शरद पवारांच्या वक्तव्यामुळे काही लोकांची झोप उडू शकते.'

शिंदे यांनी आपल्या भाषणात जरी राजकीय चिमटे काढले असले तरी त्यांनी मुंबई क्रिकेट असोसिएशनच्या निवडणुकीत राजकारण नाही हे देखील सांगितले. ते म्हणाले की, 'जर यात राजकारण असतं तर इतके सगळे लोक एकाच व्यासपीठावर आले नसते. महाराष्ट्राला आणि मुंबईला एक वेगळी परंपरा आहे.' शिंदे यांनी हे सरकार सर्वांचे आहे ते क्रिकेटपटू आणि खेळाडूंचेही आहे असे म्हणत क्रिकेटपटू आणि संस्थाच्या प्रश्नावर तोडगा काढण्याचे आश्वासन देखील दिले.

अमोल काळे हे आशिष शेलार पॅनेलचे उमेदवार आहेत. तर पूर्वी संदीप पाटील हे शरद पवार यांच्या पॅनेलचे उमदेवार होते. मात्र शरद पवार यांनी उडी मारत आशिष शेलार यांच्या उमेदवाराला पाठिंबा दिला. शिवसेनेच्या मिलिंद नार्वेकर यांनी देखील शेलार पॅनेलच्या अमोल काळेंना पाठिंबा दिला आहे.