भारत आणि श्रीलंका यांच्यात बंगळुरुच्या मैदानात झालेल्या डे-नाइट कसोटी सामन्यात भारतीय संघाने दिमाखदार विजय नोंदवला. श्रीलंकेविरुद्धच्या दुसऱ्या कसोटी सामन्यातील विजयासह भारतीय संघाने कसोटी मालिका 2-0 अशी जिंकली. मात्र आता भारतीय संघाच्या या दिमाखदार खेळाला खेळपट्टीमुळं गालबोट लागलं आहे. आंतरराष्ट्रीय क्रिकेट परिषदेनं (ICC) ने भारतीय क्रिकेट नियामक मंडळाला (BCCI) धक्का दिलाय.

मॅच रेफ्री जवागल श्रीनाथ यांनी डे-नाइट कसोटी सामन्यासाठी वापण्यात आलेल्या खेळपट्टीवर सरासरीपेक्षा कमी दर्जाची खेळपट्टी असल्याचा शेरा मारला आहे. त्यामुळे बंगळुरुच्या खेळपट्टीला आयसीसी पिच अँण्ड आउटफील्ड मॉनीटरिंग प्रक्रियेनुसार एक डिमेरिट पाँइंट देण्यात आलाय.

भारतीय संघाने बंगळुरु कसोटी सामन्यात 238 धावांनी दिमाखदार विजय मिळवला होता. रोहित शर्माच्या नेतृत्वाखालील टीम इंडियाने ही मॅच तिसऱ्या दिवशीच संपवली. या सामन्यात रविचंद्रन अश्विन आणि जसप्रीत बुमराह यांनी लक्षवेधी कामगिरी केली होती. अश्विन चार विकेट घेतल्या होत्या. तर बुमराहनं पहिल्या डावात पाच आणि दुसऱ्या डावात तीन विकेट मिळवल्या होत्या.

श्रीलंकेकडून कर्णधार दिमुथ करुणारत्ने एकटा लढला होता. त्याने कसोटी कारकिर्दीतील 14 वे शतक झळकावले. पण ही खेळी श्रीलंकन संघाचा पराभव टाळू शकली नाही. भारतीय संघाने या सामन्यात श्रीलंकेसमोर 447 धावांचे लक्ष्य दिले होते. या धावांचा पाठलाग करताना श्रीलंकेचा डाव 208 धावांत आटोपला होता. याआधी मोहाली कसोटीत भारतीय संघाने डावासह 222 धावांनी लंकेला धूळ चारली होती.