Gautam Gambhir On Virat Kohli Retirement : भारताने तब्बल 17 वर्षानंतर टी 20 वर्ल्डकप जिंकला. दक्षिण आफ्रिकेचा 7 धावांनी पराभव करत भारताने दुसऱ्यांदा टी 20 वर्ल्डकपवर नाव कोरलं. फायनलमध्ये 76 धावांची झुंजार खेळी करणाऱ्या विराट कोहलीने फायनलनंतर टी 20 वर्ल्डकपमधून निवृत्तीची घोषणा केली. पाठोपाठ रोहित शर्माने देखील प्रेस कॉन्फरन्समध्ये निवृत्ती जाहीर केली.

विराट कोहली आणि रोहित शर्मा यांनी गौतम गंभीरने टीम इंडियाचे प्रशिक्षक पद हातात घेण्यापूर्वीच निवृत्तीची घोषणा केली आहे. दरम्यान या दोघांच्या निवृत्तीवर गौतम गंभीरने प्रतिक्रिया दिली आहे.

गौतम गंभीर म्हणाला की, 'संपूर्ण देश खूप खूश आहे. मी रोहित शर्मा आणि संपूर्ण संघाचे अभिनंदन करतो.' गंभीरने विराट अन् रोहितच्या निवृत्तीबाबत देखील वक्तव्य केले.

तो म्हणाला, 'टी 20 वर्ल्डकप जिंकून आपली टी 20 कारकीर्द संपवणे यापेक्षा चांगली दुसरी गोष्ट कोणती असू शकते. हे दोघेही महान खेळाडू आहेत. त्यांनी भारतीय क्रिकेटसाठी बरेच योगदान दिले आहे. मी त्या दोघांचे अभिनंदन करू इच्छितो तसेच ते वनडे आणि कसोटी क्रिकेट खेळणार आहेत. ते देशाच्या यशात आपले योगदान देतील.'

भारताने टी 20 वर्ल्डकप जिंकल्यानंतर संघातील तीन वरिष्ठ खेळाडूंनी टी 20 फॉरमॅटमधून निवृत्ती जाहीर केली. विराट कोहली, रोहित शर्मा आणि रविंद्र जडेजा यांनी टी 20 फॉरमॅटला अलविदा केलं.

यंदाच्या टी 20 वर्ल्डकपनंतर हे तिघे निवृत्त होतील अशी शक्यता पूर्वीच वर्तवली होती. त्यामुळे या तिघांचा हा शेवटचा टी 20 वर्ल्डकप होता.