India vs South Africa T20 World Cup 2024 Final Barbados Weather Forecast : भारत आणि दक्षिण आफ्रिका यांच्यातील टी-20 वर्ल्ड कप 2024 चा अंतिम सामना 29 जून रोजी भारतीय वेळेनुसार रात्री 8 वाजता बार्बाडोस येथे खेळला जाणार आहे. एकीकडे टीम इंडियाने सेमीफायनलमध्ये इंग्लंडला हरवून फायनलमध्ये धडक मारली आहे, तर दुसरीकडे टीम दक्षिण आफ्रिकेने अफगाणिस्तानला हरवून फायनलमध्ये प्रवेश केला आहे.

आता हे दोन्ही संघ प्रथमच वर्ल्ड कपच्या अंतिम फेरीत आमनेसामने येणार आहेत. उपांत्य फेरीप्रमाणेच अंतिम सामन्यावरही पावसाचे सावट आहे. अंतिम सामन्याच्या दिवशी बार्बाडोसमधील हवामानाबाबत एक मोठी अपडेट समोर आले आहे.

भारत आणि दक्षिण आफ्रिका यांच्यातील अंतिम सामना ब्रिजटाऊन, बार्बाडोस येथे होणार आहे. त्याचबरोबर या सामन्यावरही पावसाचे सावट दिसत आहे. Weather.com नुसार, 29 जून रोजी बार्बाडोसमध्ये जोरदार वारे आणि मुसळधार पाऊस अपेक्षित आहे. सामन्यादरम्यान पावसाची शक्यता 70 टक्क्यांपर्यंत आहे. त्यानंतर चाहत्यांना पुन्हा एकदा पावसाने व्यत्यय आलेला सामना पाहायला मिळेल.

फायनलसाठी राखीव दिवस

आयसीसीने अंतिम सामन्यासाठी राखीव दिवसही ठेवला आहे. 29 जूनचा सामना पावसामुळे रद्द झाला तर 30 जूनला अंतिम सामना खेळला जाईल. याशिवाय अंतिम सामन्यासाठी 190 मिनिटांचा अतिरिक्त वेळही ठेवण्यात आला आहे. असे असतानाही राखीव दिवशीही पावसामुळे सामना रद्द झाल्यास भारत आणि दक्षिण आफ्रिका यांना संयुक्त विजेता घोषित केले जाईल.

टी-20 वर्ल्ड कप 2024 मध्ये दोन्ही संघ अजिंक्य

यावेळी दक्षिण आफ्रिका आणि टीम इंडियाने वर्ल्ड कपमध्ये एकही सामना गमावलेला नाही. दक्षिण आफ्रिकेने 8 सामने खेळले आहेत, तर टीम इंडियाने 7 सामने खेळले आहेत. टीम इंडियाचा एक सामनाही पावसामुळे गमवावा लागला. टीम इंडियाने तिसऱ्यांदा टी-20 वर्ल्ड कपच्या अंतिम फेरीत धडक मारली आहे. याशिवाय दक्षिण आफ्रिकेला वर्ल्ड कपच्या सुरुवातीपासून प्रथमच अंतिम फेरीत स्थान मिळवण्यात यश आले आहे.