T20 World Cup 2024: टी२० वर्ल्ड कप २०२४ स्पर्धेतील सुपर-८ फेरी मंगळवारी संपली. या फेरीतील अखेरच्या दोन सामन्यांपैकी एका सामन्यात भारतीय संघाने ऑस्ट्रेलियाला २४ धावांनी, तर दुसऱ्या सामन्यात अफगाणिस्तानने बांगलादेशला ८ धावांनी पराभूत करत उपांत्य फेरी गाठली आहे.

यानंतर अफगाणिस्तानचा कर्णधार राशीद खानने इंस्टाग्रामवर खास पोस्ट शेअर केली आहे. राशीदचे भारताशी आणि भारतीय क्रिकेटशी जवळचे नाते आहे.

भारतीय कर्णधार रोहित शर्माबाबत त्याच्या मनात मोठा आदर आहे. हेच त्याने उपांत्य फेरी गाठल्यानंतर प्रामुख्याने ऑस्ट्रेलियाला बाहेरचा रस्ता दाखवल्यानंतर इंस्टाग्रामवरील पोस्टमधून दाखवून दिले.

खरंतर भारत आणि अफगाणिस्तान सुपर-८ मध्ये एकाच ग्रुपमध्ये होते. या ग्रुपमध्ये ऑस्ट्रेलिया आणि बांगलादेशही होते. मात्र, भारत आणि अफगाणिस्तानने या दोन्ही देशांना मागे टाकत ग्रुपमध्ये अनुक्रमे पहिले आणि दुसरे स्थान मिळवत उपांत्य फेरी गाठली.

यानंतर राशीदने रोहित शर्माबरोबरचा एक फोटो इंस्टाग्रामवर शेअर केला असून त्यावर कॅप्शन लिहिले आहे की 'बंबईस आया मेरा दोस्त... सेमीफायनल'.

तसेच या फोटोच्या बॅकग्राऊंडला ‘ये दोस्ती हम नही तोडेंगे’ हे गाणं वाजत आहे. राशीदच्या या पोस्टने अनेक चाहत्यांची मनं जिंकली असून ही पोस्ट व्हायरल होत आहे.

दरम्यान, भारत आणि अफगाणिस्तान सुपर-८ मध्ये आमने-सामने आले होते, पण त्यावेळी भारताने अफगाणिस्तानला पराभूत केले होते.

आता जर भारत आणि अफगाणिस्तान यांनी उपांत्य फेरीचे सामने जिंकले, तर दोघांमध्ये अंतिम सामना होऊ शकतो. उपांत्य फेरीत भारताला इंग्लंडविरुद्ध, तर अफगाणिस्तानला दक्षिण आफ्रिकेविरुद्ध सामना खेळायचा आहे.

अफगाणिस्तान आणि दक्षिण आफ्रिका यांच्यातील उपांत्य सामना २७ जून रोजी भारतीय प्रमाणवेळेनुसार पहाटे ६ वाजता चालू होईल, तर भारत आणि इंग्लंड संघातील उपांत्य सामना २७ जून रोजी भारतीय प्रमाणवेळेनुसार रात्री ८ वाजता चालू होणार आहे.