India vs Pakistan T20 World Cup 2024 : नासाऊ स्टेडियमवर बसवण्यात आलेल्या खेळपट्टीबाबत प्रश्नचिन्ह वाढत आहे. त्यातच आज भारत-पाक सामना होत आहे. ही खेळपट्टी कशी असेल, याबाबत आम्ही क्युरेटरना विचारले तेव्हा तेही अनभिज्ञ राहिले, त्यामुळे आम्हाला खेळपट्टी कशी ओखळता येणार, असे मत भारतीय कर्णधार रोहित शर्माने व्यक्त केले.

चेंडू कमी-अधिक प्रमाणात उडत असलेल्या खेळपट्टीवर फलंदाजी करणे आव्हानात्मक ठरले आहे. भारत-पाक सामन्यासाठी दोन दिवसांपासून पाणी देऊन अधिक प्रमाणात रोलिंग करण्यात आले, तरीही खेळपट्टी नक्की कशी असेल, याबाबत क्युरेटरना काहीच सांगता आले नाही. परिणामी, आजच्या सामन्याबाबत उत्सुकता वाढली आहे.

पूर्वीसारखी आता भारत-पाक सामन्याची उत्कंठा राहिलेली नाही, कारण गेल्या सहा महिन्यांत आम्ही आशिया करंडक आणि एकदिवसीय विश्वकरंडक स्पर्धेत एकमेकांविरुद्ध खेळलो आहोत, असे रोहित म्हणाला.

आयपीएलमध्ये मी रिषभ पंतची फलंदाजी पाहत होतो तेव्हाच त्याला या विश्वकरंडक स्पर्धेसाठी तिसऱ्या क्रमांकावर खेळवायचा हा विचार मी पक्का केला होता, असेही रोहितने सांगितले.