India vs New Zealand, T20 World Cup 2021: भारताचा टी२० विश्वचषकातील आज दुसरा सामना न्यूझीलंडशी होणार आहे. भारताला पहिल्या सामन्यात पाकिस्तानकडून अपमानकारक पराभव पत्करावा लागला होता. न्यूझीलंडचादेखील हा स्पर्धेतील दुसरा सामना आहे. त्यांनाही पहिल्या सामन्यात पाकिस्तानने पराभूत केले होते. त्यामुळे आजचा सामना महत्त्वाचा आहे. अशा वेळी माजी कर्णधार सुनील गावसकर यांनी आपलं मत व्यक्त केलं.

"न्यूझीलंडचा संघ हा कायम संतुलित संघ म्हणून ओळखला जातो. त्यांच्या संघामध्ये संघर्ष करण्याची वृत्ती आहे. न्यूझीलंडचे खेळाडू कोणत्याही परिस्थितीत हार मानत नाहीत. त्यामुळे न्यूझीलंड विरोधात खेळताना सर्व गोष्टींचा विचार करावा लागतो. न्यूझीलंडच्या संघाला पटकन मात देता येत नाही. पण असं असलं तरी भारतीय संघाने न्यूझीलंडला ५-० ने पराभूत केले होते हे विसरू नका. त्या पाच सामन्यापैकी २ सामने सुपर ओव्हरपर्यंतही गेले होते. त्यामुळे या मालिकेची आठवण ठेवून टीम इंडियाने मैदानात उतरावे", असं गावसकर म्हणाले.

भारत-न्यूझीलंड आकडेवारी

भारत आणि न्यूझीलंड यांच्यात एकूण १६ टी२० सामने खेळण्यात आले आहेत. त्यापैकी भारताचा ८ सामन्यात तर न्यूझीलंडचा ८ सामन्यात विजय झाला आहे. पण टी२० विश्वचषकात आतापर्यंत हे दोन संघ दोन वेळा आमनेसामने आले असून दोन्ही वेळा भारतीय संघ पराभूत झाला आहे. इतकंच नव्हे तर २००७ च्या विश्वचषक स्पर्धेचा विजेता असलेला भारतीय संघ त्या स्पर्धेत केवळ एकाच सामन्यात पराभूत झाला होता. त्यावेळीदेखील भारताला केवळ न्यूझीलंडनेच पराभूत केलं होतं.