इंग्लंडमध्ये 2019 मध्ये रंगलेल्या वर्ल्ड कप स्पर्धेनंतर भारतीय संघापासून हळू-हळू दूर निघून गेलेला महेंद्रसिंह धोनी पुन्हा एकदा भारतीय संघासोबत दिसत आहे. आश्चर्यकारक धक्का देत आंतरराष्ट्रीय क्रिकेटमधून निवृत्ती घेतल्यानंतर तो पुन्हा टीम इंडियाच्या ताफ्यात एका मोठ्या मिशनची धूरा सांभाळताना दिसेल, असा विचार कोणीच केला नव्हता. पण टी-20 वर्ल्ड कप स्पर्धेसाठी मेंटॉरच्या रुपात धोनी पुन्हा एकदा टीम इंडियाला मार्गदर्शनाचे धडे देताना दिसतोय.

चेन्नई सुपर किंग्जला आयपीएलचे जेतेपद मिळवून दिल्यानंतर धोनी आता भारतीय संघाला वर्ल्ड चॅम्पियन बनवण्यासाठी सज्ज झालाय. विराट कोहलीच्या नेतृत्वाखालील भारतीय संघाने सर्वोच्च कामगिरी केलीये यात कोणतीच शंका नाही. पण त्याच्या नेतृत्वाखाली संघाला एकही आयसीसी ट्रॉफी जिंकता आलेली नाही. त्याच्यावरील हा ठपका पुसून काढण्यासाठी धोनीची रणनिती कितपत फायदेशीर ठरणार हे चित्र पुढील महिन्याभरात स्पष्ट होईल.

तत्पूर्वी मैदानात पुन्हा एकदा विराट-धोनी या जोडगोळीची चर्चा रंगण्यास सुरुवात झाली आहे. ज्यावेळी धोनीने टप्प्याटप्प्याने संघाचे नेतृत्व सोडले आणि विराट कोहलीच्या नेतृत्वाखाली खेळताना दिसला तेव्हापासून धोनी-विराट यांच्याविषयी चर्चा रंगायची. भारतीय संघ दोन कॅप्टनसह मैदानात उतरतो. हेच टीम इंडियाच्या यशामागचे गुपित आहे, असे बोलले जायचे.

खुद्द विराट कोहलीने फिल्डवर धोनीच माझा कॅप्टन असल्याचे बोलून दाखवून धोनीविषयी आदर भावना व्यक्त केली होती. आता पुन्हा एकदा मैदानात या दोघांच्या हळव्या संवादाची कहाणी सुरु झाली आहे. इंग्लंड विरुद्धच्या सराव सामन्यानंतर बीसीसीआयने विराट कोहली आणि महेंद्रसिंह धोनी यांचा एक खास फोटो शेअर केलाय. या फोटोला त्यांनी खास कॅप्शन दिले आहे. हलक्या अंतःकरणाने होणारे सुसंवाद असेच काहीसे असतात. अशा आशयाच्या ओळींसह धोनी आणि कोहलीचा फोटो शेअर केलाय. हा बोलका फोटो खूप काही गोष्टी सांगून जाणारा आहे.