टी-20 वर्ल्ड कप स्पर्धेतील शेवटचा सामना खेळण्यासाठी भारतीय संघ मैदानात उतरला आहे. नामिबिया विरुद्धचा सामना विराट कोहलीसाठी खास असा आहे. याच कारण या सामन्यानंतर विराट कोहली टी-20 संघाच्या कर्णधार असणार नाही. वर्ल्ड कप स्पर्धेपूर्वीच विराट कोहलीने टी20 संघाचे नेतृत्व सोडणार असल्याचे स्पष्ट केले होते. त्याच्या नेतृत्वाखाली भारतीय संघ यंदाच्या स्पर्धेत विशेष छाप सोडेल अशी आशा होती. मात्र हे स्वप्नच राहिले आहे.

विराटच्या नेतृत्वाखाली तिसऱ्यांदा आयसीसीची मोठी स्पर्धा जिंकण्यात टीम इंडियाच्या पदरी निराशा आली. कॅप्टन्सीच्या अखेरच्या सामन्यात टॉसचा बॉस होण्याच भाग्य मात्र विराट कोहलीला लाभले. टॉस जिंकून त्याने पहिल्यांदा गोलंदाजी करण्याचा निर्णय घेतलाय. यंदाच्या स्पर्धेतील पाचव्या सामन्यात दुसऱ्यांदा त्याने टॉस जिंकला आहे. बहुतांश टॉस हे विराटच्या विरोधात लागल्याचे पाहायला मिळाले आहे. याची चांगली चर्चाही रंगते. विराट ज्यावेळी टॉस जिंकतो त्यावेळी त्याच्या चेहऱ्यावर गजबवाली स्माईल दिसते. आजही ती स्माईल पाहायला मिळाली.

भारतीय संघाला स्पर्धेतील सलामीच्या सामन्यात पाकिस्तान विरुद्ध पराभवाचा सामना करावा लागला. न्यूझीलंड संघाने त्यांना सलग दुसऱ्या पराभवाचा धक्का दिल्यानंतर टीम इंडिया अडचणीत आली. अफगाणिस्तान विरुद्ध त्यांनी 200 + धावा करुन यंदाच्या स्पर्धेतील सर्वोच्च धावसंख्या नोंदवली. स्कॉटलंड विरुद्धही विराटने टॉस जिंकला आणि बर्थ डे दिवशी त्याल विजयी गिफ्ट मिळाले. पण स्पर्धेतील त्यांचे आव्हान संपुष्टात आले आहे. विराट कोहलीच्या नेतृत्वातील अखेरचा सामना भारतीय संघ मोठ्या दिमाखात जिंकून शेवट गोड करण्यासाठी प्रयत्नशील असेल.