T20 World Cup 2024: २० संघ, २९ दिवस आणि ५५ सामने... यानंतर टी२० वर्ल्ड कप २०२४ स्पर्धेला भारतीय संघाच्या रुपात विजेता मिळाला. भारतीय संघाने बार्बाडोसला झालेल्या अंतिम सामन्यात दक्षिण आफ्रिकेला ७ धावांनी पराभूत केलं आणि विश्वविजेतेपदावर नाव कोरले.

दरम्यान, या संपूर्ण स्पर्धेत अनेक खेळाडूंनी आपल्या कामगिरीने लक्ष वेधलं. त्याचमुळे या खेळाडूंमधून सर्वोत्तम प्लेइंग इलेव्हन कशी तयार होऊ शकते याचा घेतलेला आढावा.

सलामीवीर - रोहित शर्मा, रेहमनुल्लाह गुरबाज

यंदाच्या टी२० वर्ल्ड कपमध्ये सलामीला खेळताना भारताचा रोहित शर्मा आणि अफगाणिस्तानच्या रेहमनुल्लाह गुरबाज यांनी शानदार कामगिरी केली आहे. हे दोघे या स्पर्धेत सर्वाधिक धावा करणारे खेळाडूही आहेत. रोहितने ८ सामन्यांत २५७ धावा केल्या, तर गुरबाजने ८ सामन्यांत २८१ धावा केल्या. याशिवाय रोहित कर्णधारपदाचीही जबाबदारी सांभाळू शकतो.

मधली फळी - निकोलस पूरन, हेन्रिक क्लासेन

मधल्या फळीत निकोलस पूरन आणि हेन्रिक क्लासेन हे दोन्ही यष्टीरक्षक फलंदाज मधल्या फळीची जबाबदारी सांभाळू शकतात. त्यांनी यंदाच्या स्पर्धेत चांगल्या धावाही केलेल्या आहेत. याशिवाय आक्रमक खेळण्याचीही त्यांच्याकडे क्षमता आहे. पूरनने ७ सामन्यांत २२८ धावा केल्या, तर क्लासेनने ९ सामन्यात १९० धावा केल्या.

अष्टपैलू - मार्कस स्टॉयनिस, हार्दिक पांड्या, अक्षर पटेल

यंदाच्या टी२० वर्ल्ड कपमध्ये मार्कस स्टॉयनिस, हार्दिक पांड्या आणि अक्षर पटेल यांची गोलंदाजीबरोबर फलंदाजीतही चांगली कामगिरी झाली. स्टॉयनिसने ७ सामन्यांत १६९ धावा करण्याबरोबरच १० विकेट्सही घेतल्या. तसेच हार्दिकने ८ सामन्यांत १४४ धावा आणि ११ विकेट्स घेतल्या. अक्षर पटेलने ९२ धावा आणि ९ विकेट्स घेतल्या.

गोलंदाज - फझलहक फारुकी, जसप्रीत बुमराह, आर्शदीप सिंग, राशिद खान

गोलंदाजांमध्ये फझलहक फारूकी, जसप्रीत बुमराह, आर्शदीप सिंग आणि राशिद खान यांना स्थान मिळू शकते. यातील राशिद खान फलंदाजीतही बऱ्यापैकी योगदान देऊ शकतो.

यंदाच्या स्पर्धेत फारुकी सर्वाधिक १७ विकेट्स घेणारा गोलंदाज आहे. त्याच्यासह आर्शदीपनेही १७ विकेट्स घेतल्या आहेत. त्याचबरोबर जसप्रीत बुमराहने १५ विकेट्स घेतल्या आहेत, तर राशिदने १४ विकेट्स घेतल्या आहेत.