India vs Ireland: टी20 वर्ल्ड कपचे नववे पर्व वेस्ट इंडिज आणि अमेरिका येथे खेळवले जात आहे. या स्पर्धेतील भारतीय संघाचा पहिला सामना आयर्लंडविरुद्ध बुधवारी (5 जून) हा सामना होणार आहे. हा सामना न्यूयॉर्कमधील नासाऊ काउंटी इंटरनॅशनल स्टेडियमवर खेळवण्यात येत आहे.

या सामन्यात भारताचा कर्णधार रोहित शर्माने नाणेफेक जिंकली असून प्रथम गोलंदाजी करण्याचा निर्णय घेतला आहे.

नाणेफक जिंकल्यानंतर रोहित शर्माने प्लेइंग इलेव्हनमध्ये स्थान मिळालेल्या खेळाडूंबद्दल माहिती दिली. यावेळी त्याने सांगितले की यशस्वी जैस्वाल आणि संजू सॅमसन यांना प्लेइंग इलेव्हनमध्ये संधी मिळालेली नाही. त्यामुळे आता रोहितबरोबर विराट कोहली सलामीला फलंदाजी करेल, यावर शिक्कामोर्तब झाले आहे.

गेल्या अनेक दिवसांपासून भारतासाठी या स्पर्धेत सलामीला फलंदाजी कोण करणार याबाबत चर्चा होत आहे. अनेक आजी-माजी क्रिकेटपटूंनीही याबाबत मतं मांडली होती.

तसेच विराटने आयपीएल २०२४ मध्ये सलामीला शानदार फलंदाजी करताना ७४१ धावा ठोकल्या होत्या. त्यामुळे भारतीय संघाची सलामी जोडी हा चर्चेचा विषय ठरला होता. पण आता अखेर या चर्चेला पूर्णविराम मिळाला आहे.

दरम्यान, टी२० वर्ल्ड कपमधील आयर्लंडविरुद्धच्या सामन्यासाठी भारताने जसप्रीत बुमराह, अर्शदीप सिंग आणि मोहम्मद सिराज या तिन्ही वेगवान गोलंदाजांना खेळवण्याचा निर्णय घेतला आहे.

तसेच फिरकी गोलंदाजीसाठी रविंद्र जडेजा आणि अक्षर पटेल या दोन्ही अष्टपैलू खेळाडूंना संधी देण्यात आली आहे. त्यामुळे कुलदीप यादव आणि युजवेंद्र चहल हे दोन्ही फिरकीपटूंना बेंचवर बसावे लागले आहे.

फलंदाजी फळीत यष्टीरक्षक ऋषभ पंत, सूर्यकुमार यादव हे असून शिवम दुबे आणि हार्दिक पांड्या हे वेगवान गोलंदाजी करणाऱ्या अष्टपैलू खेळाडूंनाही संधी देण्यात आली आहे.

भारत आणि आयर्लंडचे प्लेइंग इलेव्हन -

भारत: रोहित शर्मा (कर्णधार), विराट कोहली, ऋषभ पंत (यष्टीरक्षक), सूर्यकुमार यादव, शिवम दुबे, हार्दिक पंड्या, रवींद्र जडेजा, अक्षर पटेल, जसप्रीत बुमराह, अर्शदीप सिंग, मोहम्मद सिराज

आयर्लंड: पॉल स्टर्लिंग (कर्णधार), अँड्र्यू बलबर्नी, लॉर्कन टकर (यष्टीरक्षक), हॅरी टेक्टर, कर्टिस कॅम्फर, जॉर्ज डॉकरेल, गॅरेथ डेलेनी, मार्क एडेअर, बॅरी मॅककार्थी, जोशुआ लिटल, बेंजामिन व्हाइट