T20 World Cup 2024 : यंदाच्या टी-20 वर्ल्ड कपचा रोमांच शिगेला पोहोचला आहे. यावेळी वर्ल्ड कपमध्ये 20 संघ खेळत आहेत. त्याचबरोबर सुपर-8 सामन्यांपूर्वी अनेक छोट्या संघांनी आपल्या उत्कृष्ट कामगिरीने सर्वांना चकित केले आहे. वर्ल्ड कपमध्ये आतापर्यंत 21 सामने खेळले गेले आहेत. यानंतर एक संघ सुपर-8 शर्यतीतून बाहेर पडला आहे, तर आता चॅम्पियन्स इंग्लंड, श्रीलंका, पाकिस्तानसह 10 संघ बाहेर पडण्याचा धोका आहे.

ओमान सुपर-8 मधून बाहेर

ओमानचा संघही या वर्ल्ड कपमध्ये पहिल्यांदाच खेळत होता. इंग्लंड आणि ऑस्ट्रेलियासारख्या मोठ्या संघांसह ओमानला ब गटात ठेवण्यात आले होते. ओमानने यंदाच्या वर्ल्ड कप स्पर्धेत आतापर्यंत 3 सामने खेळले असून तिन्ही सामन्यांमध्ये संघाला पराभवाचा सामना करावा लागला आहे. त्यामुळे ओमान सुपर-८ च्या शर्यतीतून बाहेर पडला आहे.

चॅम्पियन्स इंग्लंड, पाकिस्तानसह 'या' 10 संघांवर आता टांगती तलवार

यंदाच्या वर्ल्ड कपमध्ये पाऊस अनेक संघांसाठी खलनायक ठरला आहे. ज्यामध्ये पहिले नाव इंग्लंडचे आहे. इंग्लंडचा पहिला सामना पावसामुळे रद्द झाला होता. त्यानंतर इंग्लंड पुढचा सामना ऑस्ट्रेलियाकडून हरला. आता गतविजेत्याला सुपर-8 शर्यतीतून बाहेर पडण्याचा धोका आहे. इंग्लंडने 2 सामने खेळले असून ते ब गटात एका गुणासह चौथ्या स्थानावर आहे.

इंग्लंडशिवाय दुसरे मोठे नाव न्यूझीलंडचे आहे. मात्र, आतापर्यंत या वर्ल्ड कपमध्ये न्यूझीलंडने केवळ एकच सामना खेळला असून पहिल्याच सामन्यात संघाला अफगाणिस्तानकडून पराभव स्वीकारावा लागला होता. क गटात किवी संघ शेवटच्या स्थानावर आहे.

तिसरे मोठे नाव पाकिस्तानचे आहे. पाकिस्तान संघाने दोन सामने खेळले असून दोन्ही सामन्यात त्यांना पराभवाचा सामना करावा लागला आहे. सध्या पाकिस्तान अ गटात चौथ्या स्थानावर आहे. याशिवाय युगांडा, नामिबिया, नेपाळ, आयर्लंड, पापुआ न्यू गिनी, श्रीलंका आणि कॅनडा या संघांनाही सुपर-8 शर्यतीतून बाहेर पडण्याचा धोका आहे.