T20 World Cup 2021 अबूधाबी येथील शेख झायद क्रिकेट स्टेडियमवरील ऑस्ट्रेलिया विरुद्धचा सामना कॅरेबियन ताफ्यातील दोन दिग्गजांसाठी खास आहे. ऑस्ट्रेलियाचा कर्णधार फिंचने टॉस जिंकून पहिल्यांदा गोलंदाजी करण्याचा निर्णय घेतला. ख्रिस गेलच्या (Chris Gayle) रुपात वेस्ट इंडीजला पहिला धक्का बसला. बाद होऊन डग आउटमध्ये परतत असताना संघातील खेळाडूंनी गेलला 'स्टँडींग ओवेशन' दिल्याचे पाहायला मिळाले. गेलने अद्याप अधिकृतरित्या निवृत्तीची घोषणा केलेली नाही.

गेल बाद झाल्यानंतर ज्या पद्धतीने संघातील खेळाडूंनी त्याला सन्मान दिला त्यावरुन हा सामना ब्रावोसह ख्रिस गेलसाठीही अखेरचा असल्याची चर्चा सोशल मीडियावर सुरु झालीये. फलंदाजीवेळी जी गोष्ट घडली त्याउलट चित्र वेस्ट इंडीजचा संघ गोलंदाजी करताना मैदानात उतरताना पाहायला मिळाले. ब्रावोला स्टँडींग ओवेशन देताना गेल आपल्या सहकाऱ्यांसोबत उभा दिसला. त्यामुळे अजूनही आंतरराष्ट्रीय सामने खेळण्यासाठी तो तयार असल्याचे दिसते.

ड्वेन ब्रावोने ब्रावो (Dwayne Bravo) यापूर्वीच निवृत्तीची घोषणा केली होती. टी-20 वर्ल्ड कप स्पर्धेनंतर आंतरराष्ट्रीय क्रिकेटला अलविदा करणार, असे त्याने स्पष्ट केले होते. ऑस्ट्रेलिया विरुद्धच्या सामन्यात ब्रावो इतर सामन्याच्या तुलनेत लवकर खेळायला आला. अखेरच्या सामन्यात अविस्मरणीय खेळी करण्यात मात्र त्याला अपयश आले. हेजलवूडच्या गोलंदाजीवर वॉर्नरने त्याला झेलबाद केले. त्याने अखेरच्या आंतरराष्ट्रीय सामन्यात 12 चेंडूत 10 धावांची खेळी केली. यात एका षटकाराचा समावेश होता.

आंतरराष्ट्रीय क्रिकेटला अलविदा केल्यानंतरही तो फ्रेंचायझी क्रिकेटमध्ये खेळताना दिसू शकते. आयपीएलमध्ये धोनीच्या नेतृत्वाखाली चेन्नई सुपर किंग्जकडून खेळणारा ब्रावो आगामी मेगा लिलावानंतर खेळणार का? तो पुन्हा धोनीच्या नेतृत्वाखाली चेन्नईमध्ये दिसणार की अन्य कोणत्या संघात सहभागी होणार या प्रश्नाची उत्तरे येणाऱ्या काळातच मिळतील.