मुंबई : भारत आणि पाकिस्तान यांच्यात आजवर अनेक सामने खेळल्या गेलेत. यात दोन्ही संघांनी विजय मिळवण्यासह पराभवाचा सामना करावा लागला. असे असले तरी आयसीसीकडून आयोजित करण्यात येणाऱ्या सामन्यात भारत पाकिस्तानकडून पराभूत झाला नव्हता. कित्येक वर्षांपासून कायम असलेला रेकॉर्ड रविवारी दुबईत तुटला. यामुळे पाच वर्षांपूर्वी माजी कर्णधार व क्रिकेटर महेंद्रसिंग धोनीने व्यक्त केलेले भाकीत खरे ठरले. आता त्‍याचा व्हिडिओ सोशल मीडियावर चांगलाच व्हायरल होत आहे.

रविवारी पार पडलेल्या सामन्यात पाकिस्तानने पहिल्यांदा भारताचा विश्वचषकात पराभव केला. भारताने दिलेले १५२ धावांचे आव्हान पाकिस्तानने दहा गडी राखून पूर्ण केले. या विजयासह पाकिस्तानने विश्वचषकातील भारताविरुद्धची पराभवाची मालिका मोडली आणि विजयाचा आनंद अनुभवला. १९९२ ते २०१९ पर्यंत खेळल्या गेलेल्या एकदिवसीय आणि टी-२० विश्वचषकात भारत पाकिस्तानकडून पराभूत झाला नव्हता.

पराभवानंतर खेळाडूंवर चाहत्यांकडून नाराजी व्यक्त केली जात असताना धोनीचा व्हिडिओ चांगलाच व्हायरल होत आहे. हा व्हिडिओ २०१६ मध्ये खेळल्या गेलेल्या टी-२० विश्वचषकातील आहे. भारताने पाकिस्तानला पराभूत केल्यानंतर पत्रकार परिषदेत धोनीने विजयाबाबत वक्तव्य केले होते. ते वक्तव्य खरे ठरल्याचे यातून दिसत आहे.

‘पाकिस्तानविरुद्ध हा आमचा ११ वा विजय आहे. आम्ही पराभूत झालो नाही याचा आम्हाला अभिमान आहे. परंतु, भविष्यात कधीतरी नक्कीच पाकिस्तानकडून पराभूत होणार आहो. तो पुढच्या पाच वर्षांनी, दहा वर्षांनी, २० वर्षांनी किंवा ५० वर्षांनंतर होईल. नेहमी आम्हीच जिंकू असे कधीही होणार नाही.’ हे वक्तव्य केल्यानंतर पाच वर्षांनी भारत पराभूत झाला.