T20 World Cup India vs England Warm up Match : लोकेश राहुल आणि इशान किशन या सलामी जोडीच्या अर्धशतकाच्या जोरावर भारतीय संघाने सराव सामन्यात आपले दिमाखदार तेवर दाखवून दिले. इंग्लंड विरुद्धच्या सराव लढतीत 6 चेंडू आणि 7 गडी राखून विजय नोंदवत भारतीय संघाने टी-20 वर्ल्ड स्पर्धेची तयारी पक्की झाली असल्याचे संकेत दिले. विराट कोहलीने टॉस जिंकून पहिल्यांदा गोलंदाजी करण्याचा निर्णय घेतला होता. मोहम्मद शमीने सर्वाधिक तीन विकेट घेत गोलंदाजीतील धार दाखवून दिली. बुमरा आणि राहुल चाहरने प्रत्येकी एक-एक विकेट घेतली. भारतीय संघाने इंग्लंडला निर्धारित 20 षटकात 5 बाद 188 धावांत रोखले होते.

धावांचा पाठलाग करताना इशान किशन आणि लोकेश राहुल या जोडीनं भारताच्या डावाला सुरुवात केली. राहुलने आयपीएलमधील आपल्या कामगिरीतील सातत्य आणखी उंचावत कमालीच्या स्ट्राइक रेटने धावा करुन रोहित सोबत भारताच्या डावाची सुरुवात करण्यासाठी तयार असल्याचे दाखवून दिले. त्याने 24 चेंडूत 6 चौकार आणि 3 षटकाराच्या मदतीने 51 धावा केल्या. मार्क वूडने त्याला बाद केले. तोपर्यंत पहिल्या विकेटसाठी त्याने इशान किशनसोबत 82 धावांची भागादारी रचली.

तो माघारी फिरल्यानंतर बॅकअप सलामीवीर इशान किशनने 46 चेंडूत 70 धावा केल्या. त्याने आपल्या खेळीत 7 चौकार आणि 3 षटकार खेचले. रिटायर हर्ट होऊन त्याला तंबूत परतावे लागले. विराट कोहली तिसऱ्या क्रमांकावर खेळायला आला. त्याला केवळ 11 धावांवर माघारी परतावे लागले. लिविंगस्टोनने त्याला बाद केले. सुर्यकुमार यादव 8 धावा करुन बाद झाला.

हार्दिक पांड्या 12 तर रिषभ पंतने 14 चेंडूत 29 धावा करत संघाच्या विजयावर शिक्कामोर्तब केले. पंतने षटकार खेचून धोनी स्टाइलमध्ये संघाला विजय नोंदवून दिला. भारतीय संघ दुसरा सराव सामना ऑस्ट्रेलिया विरुद्ध खेळणार आहे. बुधवारी दुपारच्या सत्रात रंगणाऱ्या या सामन्यात रोहित शर्मा खेळताना दिसणार का? हे पाहणे महत्त्वाचे ठरेल.