New Zealand vs Scotland : दुबईच्या आंतरराष्ट्रीय मैदानावर स्कॉटलंडने न्यूझीलंडला तगडी फाइट दिली. मार्टिन गप्टीलच्या 93 धावांच्या जोरावर न्यूझीलंडने पहिल्यांदा फलंदाजी करताना निर्धारित 20 षटकात 172 धावा केल्या होत्या. बोल्ट, साउदी आणि सोधी यांच्या माऱ्यावर उत्तम फटकेबाजी करत स्कॉटलंडने 5 गड्यांच्या मोबदल्यात 156 धावांपर्यंत मजल मारुन दाखवली.

न्यूझीलंडच्या संघाने अवघ्या 16 धावांनी विजय नोंदवत सेमी फायनलच्या दिशेनं आणखी एक पाउल पुढे टाकले आहे. टीम इंडियाने न्यूझीलंड विरुद्ध अवघ्या 110 धावा केल्या होत्या. धावांचा पाठलाग करताना स्कॉटलंडने दीडशे धाव करुन दाखवत आपल्या फलंदाजीत क्षमता सिद्ध केली. स्कॉटलंडकडून मायकल लीसने 20 चेंडूत 3 षटकार आणि 3 चौकाराच्या मदतीने 42 धावांची नाबाद खेळी केली.

स्कॉटलंडच्या संघाचा सुपर 12 मधील दुसऱ्या गटातील सलग तिसरा पराभव असून न्यूझीलंडने सलग दुसऱ्या विजयासह आपल्या खात्यात 4 गुण जमा केले आहेत. न्यूझीलंडने तीन पैकी दोन सामने जिंकले आहेत. सलामीच्या सामन्यात त्यांना पाकिस्तानकडून पराभव स्विकारावा लागला होता. टीम इंडियापाठोपाठ स्कॉटलंड विरुद्ध त्यांना विजय मिळाला असला तरी नेट रनरेटच्यामध्ये ते कुठेतरी कमी पडले. परिणामी अफगाणिस्तानचा संघ दुसऱ्या गटात दुसऱ्या स्थानावर आहे. अफगाणिस्तानने 3 सामन्यातील 2 सामने जिंकले असून त्यांचे नेट रनरेट न्यूझीलंडपेक्षा उत्तम आहे.