मुंबई : पाकिस्तानने आयसीसीच्‍या सामन्यांमध्ये पहिल्यांदा विजय मिळविलानंतर देशभरात अनेक ठिकाणी फटाके फोडण्यात आले. पाकिस्तानचा विजयाचा आनंद साजरा करण्यात आला. याचा सोशल मीडियावर चांगलाच विरोध करण्यात आला. तसेच देशातील जम्मू-काश्मीर, उत्तर प्रदेश अशा अनेक ठिकाणी कारवाई करण्यात आली. जल्लोष करणाऱ्यांना मारहाण करण्यात आली. या कारवाईवर नाराजीचा सूर उमटत आहे. अशात महाविकास आघाडीमधील ऊर्जामंत्री नितीन राऊत यांनी तुम्ही विराट कोहलीला अटक करणार का, असा प्रश्न उपस्थित केला.

रविवारी पाकिस्तान आणि भारत यांच्यात सामना खेळला गेला. या सामन्यात दहा गड्यांनी भारताला पराभूत व्हाव लागले. भारताच्या पराभवाचा अनेक ठिकाणी फटाके फोडून जल्लोष करण्यात आला. याचे सोशल मीडियावर फोटो आणि व्हिडिओ चांगलेच व्हायरल झाले. यानंतर पाकिस्तानच्या विजयाचा आनंद साजरा करणाऱ्या नागरिकांवर बेकायदेशीर कृत्ये प्रतिबंधक कायद्याखाली (Unlawful Activities Prevention Act) कारवाई करण्यात येत आहे.

पीडीपीए प्रमुख मेहबूबा मुक्ती यांनी पाकिस्तानच्या विजयाचा आनंद साजरा करणाऱ्या विद्यार्थ्यांविरुद्ध यूएपीएअंतर्गत केलेल्या कारवाईचा निषेध केला. तसेच जम्मू-काश्मीर स्टुडंट्स युनियनने लेफ्टनंट गव्हर्नर मनोज सिन्हा यांनीही आरोप रद्द करण्याची विनंती केली आहे. या कारवाईंना कडाडून विरोध होत आहे. यात महाविकास आघाडीतील ऊर्जामंत्री नितीन राऊत यांनीही उडी घेतली आहे. त्यांनी कर्णधार विराट कोहलीने पाकिस्तानी खेळाडूंचे कौतुक केल्याने युएपीए अंतर्गत अटक करणार का, असा प्रश्न उपस्थित केला आहे.

मिठी दिल्याचा फोटो व्हायरल

पाकिस्‍तानने विजय मिळविल्यानंतर भारतीय कर्णधार विराट कोहलीने पाकिस्तानचा सलामीवीर मोहम्मद रिझवानला मिठी मारली होती. हा फोटो सोशल मीडियावर चांगलाच व्हायरल झाला. खेळाडूंमध्ये मैत्रिपूर्ण संबंध पाहून अनेकांनी कौतुक केले होते. हीच खेळाची गरज असल्याचे म्हटले गेले होते. मात्र, देशात युएपीए अंतर्गत होत असलेल्या कारवाईमुळे विराट कोहलीलाच अटक करणार का, असा प्रश्न नितीन राऊत यांनी उपस्थित केला आहे. त्यामुळे राजकीय आणि क्रीडा वर्तुळात चर्चेला उधाण आले आहे.