Indian Cricket Team Open Top Bus Parade : भारतीय संघाने 29 जूनला दक्षिण आफ्रिकेचा 7 धावांनी पराभव करत टी 20 वर्ल्डकप आपल्या कवेत घेतला. रात्री जागून टीम इंडियाची ही ऐतिहासिक कामगिरी पाहणाऱ्या चाहत्यांना आपली विश्वविजेती टीम कधी मायदेशात परतणार याची उत्सुकता होती. मात्र बार्बाडोसमध्ये आलेल्या बेरील वादळामुळे टीम इंडिया तेथेच अडकून पडली.

अखेर आज (दि. 3) एअर इंडियाच्या खास विमानाने भारतीय संघ मायदेशात परतण्यासाठी रवाना झाला आहे. या खास विमानात खेळाडू, स्टाफ अन् त्यांचे कुटुंबीय देखील असतील. दरम्यान, बीसीसीआयचे उपाध्यक्ष राजीव शुक्ला यांनी टीम इंडियाचे मायदेशात कशा प्रकारे स्वागत केलं जाईल याची माहिती दिली. त्यांनी टीम इंडियाच्या स्वागताचे शेड्युल सांगितले.

भारताचा माजी कर्णधार महेंद्रसिंह धोनीने 2007 मध्ये पहिला टी 20 वर्ल्डकप जिंकल्यानंतर विजेत्या संघाचं मुंबईत जंगी स्वागत करण्यात आलं होतं. त्यावेळी ओपन टॉप बसमधून संघाची मिरवणूक काढली होती. आता रोहित शर्माच्या नेतृत्वाखाली भारताने दुसऱ्यांदा टी 20 वर्ल्डकपवर नाव कोरलं. आता त्या संघाचे देखील धोनीच्या संघासारखेच जंगी स्वागत होणार आहे.

भारतात दाखल झाल्यावर कसं असेल टीम इंडियाचं शेड्युल?

भारतीय संघ उद्या ( 4 जुलै) सकाळी सहा वाजता भारतात दाखल होणार आहे. भारतात दाखल झाल्यानंतर भारतीय संघ पहिल्यांदा पंतप्रधान नरेंद्र मोदींची भेट घेणार आहे. पंतप्रधानांनी भारतीय संघासाठी नाष्ट्याचे आयोजन केले आहे.

यानंतर भारतीय संघ संध्याकाळपर्यंत मुंबईत दाखल होईल. भारतीय संघ मुंबईत दाखल झाल्यानंतर त्यांची ओपन टॉप बसमधून नरिमन पाईंट येथून ऐतिहासिक वानखेडे स्टेडियमपर्यंत मिरवणूक काढण्यात येणार आहे.

भारतीय संघ वानखेडे स्टेडियमवर पोहचल्यानंतर तेथे त्यांच्या स्वागतासाठी विशेष कार्यक्रम आयोजित करण्यात आला आहे. याचबरोबर या कार्यक्रमावेळी भारतीय संघातील खेळाडू, प्रशिक्षक आणि सहाय्यक स्टाफ यांना 125 कोटी रूपयांच्या कॅश प्राईजचे बीसीसीआयकडून वितरण केलं जाईल.

याबाबतची सर्व माहिती बीसीसीआयचे उपाध्यक्ष राजीव शुक्ला यांनी एएनआयशी बोलताना दिली आहे.