Mahmudullah T20I Retirement: भारत विरुद्ध बांगलादेश संघात सध्या टी२० मालिका खेळवली जात आहे. या मालिकेतील पहिल्या सामन्यात भारताने ३ विकेट्सने सहज विजय मिळवला. आता बुधवारी या मालिकेतील दुसरा सामना खेळला जाणार आहे, तर १२ ऑक्टोबर रोजी ही मालिका संपणार आहे.
दरम्यान, ही मालिका बांगलादेशचा स्टार अष्टपैलू खेळाडू महमुद्दुलाहची अखेरची आंतरराष्ट्रीय टी२० मालिका ठरणार आहे. महमुद्दुलाहने आंतरराष्ट्रीय टी२० क्रिकेटमधून निवृत्तीची घोषणा केली आहे.
निवृत्तीबाबत महमुद्दुलाह म्हणाला, त्याने निवृत्तीचा विचार मालिकेपूर्वीच केला होता. याबाबत त्याने कर्णधार आणि प्रशिक्षकांशीही चर्चा केली होती. तसेच मी बांगलादेश क्रिकेट बोर्डाच्या अध्यक्षांनाही कल्पाना दिली होती. या प्रकारातून लांब होण्याची आणि फक्त वनडेवर लक्ष केंद्रीत करण्याची हीच योग्य वेळ आहे.
तसेच त्याने टी२० वर्ल्ड कप २०१६ मध्ये भारताविरूद्धचा अवघ्या १ धावेने झालेला पराभव सर्वाधिक त्रासदायक होता असंही म्हटलं. तसेच २०१८ निदाहास ट्रॉफीमध्ये त्याचा आवडता क्षण होता असं त्याने म्हटले आहे.
निदाहास ट्रॉफीमध्ये त्याने श्रीलंकेविरुद्ध १८ चेंडूत ४३ धावांची महत्त्वाची खेळी केली होती, ज्यामुळे बांगलादेशला अंतिम सामन्यात पोहचला आले होते. पण अंतिम सामन्यात त्यांना भारताविरुद्ध पराभूत व्हावं लागलं होतं.
खरंतर शाकिब अल हसनप्रमाणेच महमुद्दुलाह देखील टी२० वर्ल्ड कप २०२४ नंतर आंतरराष्ट्रीय क्रिकेटमधून निवृत्ती घेईल अशी चर्ता होती. मात्र, त्याचा भारताविरूद्धच्या टी२० मालिकेसाठी संघात समावेश करण्यात आल्याने या चर्चांना पूर्णविराम लागला होता. पण आता महमुद्दुलाहने टी२० निवृत्तीची घोषणा केली आहे.
भारताविरुद्धच्या मालिकेपूर्वीही बांगलादेशचा कर्णधार नजमुल हुसैन शांतोने महमुद्दुलाहच्या आंतरराष्ट्रीय टी२० निवृत्तीचे संकेत दिले होते. त्याने म्हटले होते की महमुद्दुलाहसाठी ही मालिका खूप महत्त्वाची आहे. तो कदाचीत निवड समितीशीही चर्चा करेल.
आता महमुद्दुलाहने निवृत्ती जाहीर केली असल्याने हैदराबादमध्ये १२ ऑक्टोबर रोजी होणारा टी२० सामना त्याचा अखेरचा आंतरराष्ट्रीय टी२० सामना ठरेल. त्याने यापूर्वीच २०२१ मध्ये कसोटीतून निवृत्ती घेतली होती. त्यामुळे तो आता फक्त वनडे क्रिकेट खेळताना दिसेल.
३८ वर्षीय महमुद्दुलाहने १३९ आंतरराष्ट्रीय टी२० सामने खेळले असून २३.४८ च्या सरासरीने २३९५ धावा केल्या आहेत. यामध्ये त्याच्या ८ अर्धशतकांचा समावेश आहे. तसेच त्याने ४० विकेट्स घेतल्या आहेत.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.