India vs Bangladesh 1st test: भारताचा कर्णधार रोहित शर्मा मैदानात असताना नेहमीच काही ना काही बोलताना दिसतो. बऱ्याचदा तो खेळाडूंना त्याच्या मुंबईच्या स्टाईलने मार्गदर्शन करताना, कधी ओरडताना, कधी क्षेत्ररक्षण लावताना दिसतो.

यादरम्यान, त्याची काही वाक्य स्टंपमाईकमध्ये कैदही होतात. त्याने एकदा भारताच्या युवा खेळाडूंना 'गार्डन मै घुमने वाले बंदे' असंही म्हटलं होतं. त्याचाही व्हिडिओ व्हायर झाला होता. आता असाच एक व्हिडिओ व्हायरल होत आहे, जो व्हिडिओ भारत आणि बांगलादेश संघात चेन्नईमध्ये सुरू असलेल्या कसोटी सामन्यादरम्यानचा आहे.

भारत आणि बांगलादेश संघात चेपॉक स्टेडियमवर १९ सप्टेंबरपासून कसोटी मालिकेतील पहिला सामना सुरू झाला आहे.

या सामन्यादरम्यानचा जो व्हिडिओ व्हायरल होत आहे, त्याच दिसते की भारतीय संघ क्षेत्ररक्षण करत असताना रोहित शर्मा चिडला आहे. तो क्षेत्ररक्षण लावत असताना चिडून भारताच्या काही क्षेत्ररक्षकांना म्हणत आहे की 'सर्वजण झोपलेत काय?' दरम्यान, रोहित नक्की कोणावर चिडला आहे, हे स्पष्ट झालेलं नाही.

दरम्यान, रोहितला या सामन्यात दोन्ही डावात मोठी खेळी करता आली नाही. तो दोन्ही डावात स्लीपमध्ये झेल देत बाद झाला. पहिल्या डावात त्याने ६ धावा केल्या होत्या, तर दुसऱ्या डावात त्याने ५ धावा केल्या. पण असं असलं तरी भारताने या सामन्यात वर्चस्व ठेवण्यात यश मिळवलं आहे.

पहिल्या डावात आर अश्विन (११३) आणि रविंद्र जडेजा (८६) यांच्या १९९ धावांच्या भागीदारीमुळे भारताने ३७६ धावा केल्या. यशस्वी जैस्वालनेही ५६ धावांची खेळी केली. या डावात बांगलादेशकडून हसन मेहमुदने ५ विकेट्स घेतल्या. त्यानंतर बांगलादेशला पहिल्या डावात सर्वबाद १४९ धावाच करता आल्या, त्यामुळे भारताने २२७ धावांची आघाडी घेतली.

या डावात भारताकडून जसप्रीत बुमराहने ४ विकेट्स घेतल्या. भारताने दुसरा डाव ४ बाद २८७ धावांवर घोषित करत बांगलादेशसमोर ५१५ धावांचे लक्ष्य ठेवले. भारताकडून दुसऱ्या डावात शुभमन गिल (११९*) आणि ऋषभ पंत (१०९) यांनी शतके ठोकली.