CPL 2024 Eliminator for Barbados Royals vs Trinbago Knight Riders: कॅरेबियन प्रीमियर लीग २०२४ स्पर्धेत मंगळवारी (१ ऑक्टोबर) एलिमिनेट सामना प्रोव्हिडेन्समध्ये त्रिनबॅगो नाईट रायडर्स विरुद्ध बार्बाडोस रॉयल्स संघात पार पडला. या सामन्यात एक अजब घटना घडली.

मैदानातील फ्लडलाईट्समध्ये काहीतरी बिघाड झाल्याने हा सामना तब्बल २ तास थांबवण्यात आला आणि मग डकवर्थ लुईस नियम वापरण्यात आला. त्यानंतर बार्बाडोसने डेव्हिड मिलरच्या वादळी खेळामुळे ९ विकेट्सने विजय मिळवला.

या सामन्यात प्रथम फलंदाजीला उतरलेल्या त्रिनबॅगो १९.१ षटकात ३ बाद १६८ धावांवर खेळत असताना मैदानातील फ्लडलाईट्समध्ये बिघाड झाल्याने सामना थांबला.

त्यावेळी निकोलस पूरन शतकाच्या जवळ होता. त्याने ६० चेंडूत ६ चौकार आणि ५ षटकारांसह ९१ धावांची नाबाद खेळी केली होती. तसेच आंद्रे रसेल २० धावांवर नाबाद होता. त्यावेळी त्रिनबॅगोकडून महिश तिक्षणा, नवीन-उल-हक आणि रेमन सायमंड्स यांनी प्रत्येकी एक विकेट घेतली होती.

दरम्यान, फ्लडलाईट्समधील बिघाडाच्या कारणाने तब्बल दोन तासासाठी सामना थांबला होता. त्यानंतर किमान स्थानिक वेळेनुसार १० वाजून ५२ मिनिटांनी ५ षटकांचा सामना होण्याची अपेक्षा होती. मात्र, ११ वाजल्यानंतर सामन्याला पुन्हा सुरुवात झाली. पण सामन्यातील बराच वेळ वाया गेल्यानंतर बार्बाडोससमोर ५ षटकात ६० धावांचे आव्हान ठेवण्यात आले.

या आव्हानाचा पाठलाग करण्यासाठी बार्बाडोसकडून कर्णधार रोवमन पॉवेल आणि क्विंनटन डी कॉक उतरले. पण डी कॉकला सुनील नरेनने ४ धावांवरच बाद केले.

पण त्यानंतर तिसऱ्या क्रमांकावर फलंदाजीला आलेल्या डेव्हिड मिलरने सुरुवातीपासून आक्रमक पवित्रा स्विकारला आणि त्याने ३ चौकार आणि ५ षटकारांची बसरात करत १७ चेंडूतच नाबाद ५० धावा केल्या. त्याच्या या खेळीमुळे बार्बाडोसने चार चेंडू राखूनच विजय मिळवला. त्यामुळे बार्बाडोसने आता क्वालिफायर्स-२ सामन्यात प्रवेश केला आहे.