Chennai Super Kings IPL 2024 : आयपीएल 2024 सुरू होण्यापूर्वीच गतविजेत्या चेन्नई सुपर किंग्जला मोठा धक्का बसला. सोमवारी एक अपडेट देताना न्यूझीलंड क्रिकेटने सांगितले की, स्टार सलामीवीर डेव्हन कॉनवे दुखापतग्रस्त झाला आहे आणि त्याला बरे होण्यासाठी किमान आठ आठवडे लागतील. अशा परिस्थितीत तो किमान आठ आठवडे क्रिकेटपासून लांब राहणार आहे.

आयपीएल 2024चा थरार 22 मार्चपासून सुरू होणार आहे. चेपॉकमध्ये चेन्नई सुपर किंग्ज (CSK) आणि रॉयल चॅलेंजर्स बंगलोर (RCB) यांच्यात पहिला सामना खेळला जाईल. कॉनवेला दुखापतीतून सावरण्यासाठी 8 आठवडे लागतील. त्याच्या अनुपस्थितीत चेन्नई सुपर किंग्ज ऋतुराजला गायकवाडसाठी नवीन जोडीदाराच्या शोधात असेल. पण आता कॉनवेच्या अनुपस्थितीत रचिन रवींद्रसाठी दार उघडले आहे. गायकवाडसह तो सीएसकेसाठी सलामीवीर म्हणून पदार्पण करू शकतो.

2023 च्या वर्ल्ड कप स्पर्धेत चमकदार कामगिरी करणाऱ्या रचिन रवींद्रला डिसेंबर 2023 मध्ये मिनी लिलावादरम्यान चेन्नई सुपरने 1.8 कोटी रुपयांना करारबद्ध केले. या 24 वर्षीय युवा फलंदाजाने 2023 मध्ये भारतात खेळल्या गेलेल्या वर्ल्ड कपमध्ये 3 शतकांच्या मदतीने 578 धावा केल्या होत्या. अशा परिस्थितीत कॉनवेच्या जागी चेन्नई त्याला प्लेइंग 11 मध्ये संधी देऊ शकते.

मात्र, रचिनसाठी कॉनवेची जागा घेणे इतके सोपे नसेल. ऋतुराजसोबत कॉनवेने गेल्या दोन मोसमात चेन्नईसाठी चांगली कामगिरी केली आहे. त्याने 23 सामन्यात 48.63 च्या सरासरीने आणि 141.28 च्या स्ट्राईक रेटने 924 धावा केल्या आहेत. त्याने 9 अर्धशतके केली आहेत. तो 2023 मध्ये चेन्नईसाठी सर्वाधिक धावा करणारा खेळाडू आहे. त्याने 16 सामन्यात 672 धावा केल्या. फायनलमध्ये त्याने 47 धावांची झटपट इनिंग खेळली.