Gautam Gambhir Press Conference Live: गौतम गंभीरच्या मार्गदर्शनाखाली टीम इंडिया पहिला दौरा खेळण्यासाठी श्रीलंकेला आज रवाना होणार आहे. ३ वन डे व ३ ट्वेंटी-२० सामन्यांच्या मालिकेसाठी BCCI ने संघ जाहीर केले आहेत. सूर्यकुमार यादव हा ट्वेंटी-२० संघाचा नवा कर्णधार म्हणून या मालिकेत दिसणार आहे. रोहित शर्माकडे वन डे संघाचे नेतृत्व कायम आहे. विराट कोहलीनेही सुट्टी संपवून मालिकेत खेळण्यासाठी होकार दिला आहे. रोहित व विराट ही दोघं २०२७चा वर्ल्ड कप खेळतील का, यावर मुख्य प्रशिक्षक गौतम गंभीरने मोठं भाष्य केलं आहे.

रोहित शर्मा आणि विराट कोहली यांनी मागील महिन्यात वर्ल्ड कपनंतर आंतरराष्ट्रीय ट्वेंटी-२० तून निवृत्ती घेतली आहे. ते वन डे संघात आहेत, परंतु दोघांनीही पस्तीशी ओलांडली आहे. ते आणखी किती वर्ष खेळतील हा प्रश्न सध्या आहे? गंभीरने हा निर्णय खेळाडूंवर सोपवला आहे, आपण फिटनेस राखू शकतो, असे त्यांना वाटत असेल तर ते खेळत राहतील, असे गौतमन स्पष्ट केले.

गौतम गंभीर म्हणाला, "मला वाटते की ते मोठ्या स्पपर्धेत काय करू शकतात हे त्यांनी त्यांनी दाखवून दिले आहे. ट्वेंटी-२० वर्ल्ड कप व वन डे वर्ल्ड कप स्पर्धेत त्यांनी आपणे नाणे खणखणीत वाजवले आहे." गौतम गंभीर पुढे म्हणाला, "मी एक गोष्ट अगदी स्पष्टपणे सांगू शकतो की त्या दोघांमध्ये भरपूर क्रिकेट शिल्लक आहे. सर्वात महत्त्वाचे म्हणजे, चॅम्पियन्स ट्रॉफी आणि ऑस्ट्रेलियाचा दौरा, यामुळे त्यांना नक्कीच प्रेरणा मिळेल. जर ते त्यांचा फिटनेस राखू शकतील, तर ते २०२७ चा वर्ल्ड कप देखील खेळतील.''

हा त्यांचा वैयक्तिक निर्णय असेल असे स्पष्ट करताना गौतम म्हणाला, ''त्यांच्यात किती क्रिकेट शिल्लक आहे, हे मी सांगू शकत नाही. शेवटी, हे त्यांच्यावर देखील अवलंबून आहे.ते संघाच्या यशात किती योगदान देऊ शकतात, हेही महत्त्वाचे आहे. विराट आणि रोहित काय करू शकतात हे पाहता, मला वाटते की त्यांच्याकडे अजूनही भरपूर क्रिकेट आहे. ते अजूनही जागतिक दर्जाचे खेळाडू आहेत आणि साहजिकच कोणत्याही संघाला या दोघांना शक्य तितक्या काळ खेळायचे आहे."