ICC T20Is Ranking Marcus Stoinis : ऑस्ट्रेलियाचा स्टार अष्टपैलू खेळाडू मार्कस स्टॉयनिसने आयसीसी टी 20 रँकिंगमध्ये मोठी झेप घेतली. आयसीसी टी 20 ऑल राऊंडर रँकिंगमध्ये त्याने अफगाणिस्तानच्या मोहम्मद नबीला खाली खेचत अव्वल स्थान पटकावले. दुसऱ्या स्थानावर श्रीलंकेचा कर्णधार वानिंदू हसरंगा तर तिसऱ्या स्थानावर बांगलादेशचा शाकीब अल हसन आला आहे.

मार्कस स्टॉयनिसने नामिबियाविरूद्धच्या सामन्यात 9 धावात दोन विकेट्स घेतल्या. त्याने यंदाच्या टी 20 वर्ल्डकपमध्ये स्कॉटलँडविरूद्ध 29 चेंडूत 59 धावांची खेळी देखील केली होती. त्याचा फायदा त्याला आयसीसी रँकिंगमध्ये झाला.

दरम्यान, आयसीसी टी 20 बॉलिंग रँकिंगमध्ये इंग्लंडचा फिरकीपटू आदिल राशिद अव्वल स्थानावर कायम आहे. तर वेस्ट इंडीजचा अकिल हुसैनने सहा स्थानांची झेप घेत दुसरे स्थान पटकावले. भारताचा सूर्यकुमार यादव टी 20 बॅटिंग रँकिंगमध्ये आपली गादी दीर्घ काळापासून राखून आहे.