India vs Bangladesh 1st Test Updates Marathi : भारतीय संघ पहिल्या कसोटीत फ्रंट सीटवर बसला आहे. बांगलादेशचा पहिला डाव १४९ धावांवर गुंडाळल्यानंतर यजमानांनी दुसऱ्या डावात दमदार फलंदाजी केली आहे. शुभमन गिल आणि ऋषभ पंत ( Rishabh Pant) यांच्या फटकेबाजीने भारताची आघाडी ४०० पार पोहोचवली आहे. दरम्यान, ऋषभचा एक मजेशीर व्हिडीओ सोशल मीडियावर व्हायरल होतोय आणि त्यात तो चक्क बांगलादेशची फिल्डिंग सेट करतोय.

भारताच्या पहिल्या डावातील ३७६ धावांच्या प्रत्युत्तरात मैदानावर उतरलेल्या बांगलादेशचा पहिला डाव १४९ धावांवर गुंडाळला गेला. पहिल्या डावात आघाडीची फळी अपयशी ठरल्यानंतर आर अश्विन ( ११३) आणि रवींद्र जडेजा ( ८६) यांनी ७व्या विकेटसाठी १९९ धावा जोडल्या. त्याआधी यशस्वी जैस्वाल ( ५६) व ऋषभ पंत ( ३९) यांनी संघाला आधार दिला होता. भारताने पहिल्या डावात ३७६ धावा केल्या. बांगलादेशचा पहिला डाव १४९ धावांवर गुंडाळला. जसप्रीतने ४, सिराज, आकाश व रवींद्र जडेजा यांनी प्रत्येकी दोन विकेट्स घेतल्या.

दुसऱ्या डावातही रोहित शर्मा ( ५), विराट कोहली (१७) काही खास करू शकले नाही. यशस्वी १० धावा करून माघारी परतल्याने भारताला ६७ धावांत ३ धक्के बसले होते. पण, शुभमन गिल व ऋषभ पंत यांनी डाव सावरला. तिसऱ्या दिवशी गिलने दोन खणखणीत षटकार खेचून अर्धशतक पूर्ण केले. कसोटीच्या दुसऱ्या डावातील ही त्याची सलग चौथी 50+ धावांची खेळी ठरली. ऋषभनेही त्याचा ट्रेड मार्क वन हँड सिक्स खेचून अर्धशतक पूर्ण केले. या दोघांनी २७.४ षटकांत शतकी भागीदारी पूर्ण केली.

ऋषभने ८८ चेंडूंत अर्धशतक पूर्ण केले आणि ही त्याची कसोटीतील तिसरी संथ फिफ्टी ठरली. २०२१ लंडन येथे इंग्लंडविरुद्ध त्याने १०४ चेंडूंचा आणि त्याचवर्षी ब्रिस्बेन येथे ऑस्ट्रेलियाविरुद्ध १०० चेंडूंचा सामना करून अर्धशतक झळकावले होते. ऋषभ व शुभमन यांनी भारताला ५० षटकांत ३ बाद १९९ धावांपर्यंत पोहोचवून आघाडी ४२२ धावांपर्यंत पोहोचवली होती.