India vs Bangladesh, 2nd Test Match: भारत विरुद्ध बांगलादेश संघात सध्या कसोटी मालिकेतील दुसरा सामना कानपूरमधील ग्रीन पार्क स्टेडियमवर पार पडला. या सामन्यात दुसऱ्या आणि तिसऱ्या दिवशी पावसाच्या अडथळ्यामुळे खेळ होऊ शकला नव्हता.

अखेर चौथ्या दिवशी संघ मैदानात उतरले. चौथ्या दिवसाच्या दुसऱ्या सत्रात बांगलादेशचा पहिला डाव ७४.२ षटकात २३३ धावांवर संपला.

पहिल्या दिवशी ३५ षटकांनंतर सामना थांबला होता. त्यावेळी बांगलादेशने ३ बाद १०७ धावा केल्या होत्या. तसेच मोमिनुल ४० धावांवर, तर मुश्फिकूर रहिम ६ धावांवर नाबाद होता.

याच धावसंख्यावरून चौथ्या दिवसाचा खेळ पुढे सुरू झाला. पण मुश्फिकूरला जसप्रीत बुमराहने फार काळ टिकू दिलं नाही. त्याने ४१ व्या षटकात त्याला ११ धावांवर त्रिफळाचीत केले.

त्यानंतर लिटन दासनेही मोमिनुलची साथ देण्याचा प्रयत्न केला, परंतु ५० व्या षटकात मोहम्मद सिराजच्या गोलंदाजीवर रोहित शर्माने हवेत उडी मारत एका हाताने अफलातून झेल घेतला आणि लिटन दासला १३ धावांवर माघारी धाडले.

शाकिब अल हसनही फार काही करू शकला नाही. ९ धावांवर खेळत असताना त्याचा झेल मोहम्मद सिराजने आर अश्विनच्या गोलंदाजीवर घेतला. पण नंतर मेहदी हसन मिराजने एक बाजू खंबीरपणे सांभाळणाऱ्या मोमिनुलची साथ देत अर्धशतकी भागीदारी केली. यादरम्यान, मोमिनुलने शतकही पूर्ण केले.

दरम्यान मोमिनुल आणि मेहदी हसन मिराजची भागीदारीही बुमराहनेच तोडली. त्याने मेहदी हसन मिराजला शुभमन गिलच्या हातून २० धावांवर माघारी धाडले. त्यानंतर आलेल्या तैजुल इस्लामलाही बुमराहने ५ धावांवर माघारी धाडले. यानंतर बांगलादेशची खालची फळी काही करू शकली नाही.

हसन मेहमुलदा सिराजने पायचीत केले, तर ७५ व्या षटकात रविंद्र जडेजाने आपल्याच गोलंदाजीवर खलीद अहमदचा झेल घेत बांगलादेशचा डाव संपवला. जडेजाने या विकेटबरोबरच त्याचे ३०० कसोटी विकेट्सही पूर्ण केले. दरम्यान, मोमिनुल मात्र दुसऱ्या बाजूने नाबाद राहिला. त्याने १९४ चेंडूत १०७ धावांची नाबाद खेळी केली. या खेळीत त्याने १७ चौकार आणि १ षटकार मारला.

भारताकडून गोलंदाजी करताना जसप्रीत बुमराहने सर्वाधिक ३ विकेट्स घेतल्या. तसेच मोहम्मद सिराज, आर अश्विन आणि आकाश दीप यांनी प्रत्येकी २ विकेट्स घेतल्या, तर रविंद्र जडेजाने १ विकेट घेतली.