राजकोट : कसोटी क्रिकेटला पुन्हा एकदा चांगला आदर मिळवून देण्यात इंग्लंड कर्णधार बेन स्टोक्सचेही मोठे योगदान आहे, अशा शब्दात इंग्लंडचा फलंदाज ऑली पोपने त्याचे कौतूक केले. गुरुवारपासून सुरु होणारा भारताविरुद्धचा सामना हा स्टोक्सचा १०० वा कसोटी सामना असणार आहे. इंग्लंडचे नेतृत्व स्वीकारल्यानवंतर बेन स्टोक्सने अनेक आव्हानात्मक परिस्थितीत संघाला काही अविस्मरणीय विजय मिळवून दिलेले आहे. बॅझबॉल या नव्या पवित्र्यामुळे कसोटी क्रिकेटमध्ये बेडर कर्णधार अशी स्वतःची ओळखही निर्माण केली आहे. इंग्लंडने मिळवलेल्या ट्वेन्टी-२० आणि एकदिवसीय विश्वकरंडक विजेतेपदामध्येही त्याने मोलाची कामगिरी केलेली आहे.

संघाला गरज लागली तेव्हा स्टोक्स हमखास मदतीला धावून आलेला आहे. ॲशेस मालिकेतील लॉर्डस येथे झालेला सामना आणि त्यात स्टोक्सने केलेली फलंदाजी आम्ही कोणीच विसरू शकत नाही, असे पोपने सांगितले. १०० कसोटी खेळणे ही फार मोठी कामगिरी असते. त्यानेही आत्तापर्यंतच्या कारकिर्दीत काही चढ उतार अनुभवले आहेत, पण कर्णधारपदाची जबाबदारी स्वीकारल्यानंतर त्याच्यातील बदल अफलातून आहे, असे पोप म्हणाला.

कर्णधार म्हणून तो निर्णयातही ठाम असतो आणि प्रत्येकाला समजावून घेत असतो. माझ्याकडे तिसऱ्या क्रमांकाची जबाबदारी असेल, असे स्टोक्सने कर्णधार झाल्यावर लगेचच मला सांगितले सोबत आत्मविश्वासही दिला. स्टोक्सचे संघ व्यवस्थापन कमालीचे आहे. केवळ खेळाडूच नव्हे तर फिजिओ, डॉक्टर यांनाही तो विश्वासात घेतो, असे सांगत पोपने त्याला १०० व्या कसोटीसाठी शुभेच्छा दिल्या. विश्वकरंडक स्पर्धा संपल्यानंतर गुडघ्यावर शस्त्रक्रिया करणारा स्टोक्स त्यानंतर थेट भारताविरुद्धच्या या मालिकेत खेळत आहे.