India Squad Selection for Sri Lanka Tour Updates: भारतीय क्रिकेट संघाला जुलैच्या अखेरीस श्रीलंका दौऱ्यावर जायचे आहे. या दौऱ्यात ३ वनडे आणि ३ टी२० सामन्यांची मालिका खेळायची आहे.

या दौऱ्यासाठी बुधवारी (१७ जुलै) भारतीय संघाच्या निवड समितीची बैठक होणार होती. मात्र आता काही मिडिया रिपोर्ट्सनुसार ही बैठक पुढे ढकलण्यात आली असून आता ती गुरुवारी (१८ जुलै) होण्याची शक्यता आहे. कारण यानंतर १९ ते २२ जुलै दरम्यान बीसीसीआयचे सचिव जय शाह हे श्रीलंकेमध्ये होणाऱ्या आयसीसीच्या बैठकीसाठी उपस्थित असतील.

दरम्यान, आता नव्या अपडेटनुसार जर गुरुवारी बैठक झाली, तर श्रीलंका दौऱ्यासाठी भारतीय संघाची घोषणाही लगेच केली जाण्याची शक्यता आहे.

सध्या या दौऱ्याबाबत अनेक प्रश्न उपस्थित झाले आहेत. रोहित शर्मा, विराट कोहली आणि रविंद्र जडेजा यांनी आंतरराष्ट्रीय टी२० क्रिकेटमधून निवृत्ती घेतली आहे. त्यामुळे ते टी२० मालिकेत नसतील, हे स्पष्ट आहे.

मात्र श्रीलंकेविरुद्धच्या वनडे मालिकेत ते खेळणार की नाही, याबाबत अद्याप माहिती मिळालेली नाही. त्यामुळे याबाबतही निवड समितीच्या बैठकीनंतरच चित्र स्पष्ट होईल. इतकंच नाही, तर रोहितच्या टी२० निवृत्तीमुळे भारताला टी२०संघासाठी दुसऱ्या कर्णधाराचीही गरज असणार आहे.

सध्या अशी चर्चा आहे की २०२६ टी२० वर्ल्ड कपपर्यंत नवनियुक्त मुख्य प्रशिक्षक गौतम गंभीर आणि निवड समितीचा सूर्यकुमार यादवकडे भारताच्या टी२० संघाचे कर्णधारपद देण्याच्या विचारात आहे.

याशिवाय जर रोहित शर्मा श्रीलंकेविरुद्धच्या वनडे मालिकेसाठीही जर उपलब्ध नसेल, तर त्याच्याऐवजी भारताच्या वनडे संघाचं नेतृत्व कोण करणार असाही एक प्रश्न आहे. श्रेयस अय्यर आणि केएल राहुल वनडे कर्णधारपदासाठी प्रबळ दावेदार आहेत.

त्यामुळे या सर्वच प्रश्नांची उत्तरं श्रीलंका दौऱ्यासाठी भारतीय संघाची घोषणा झाल्यानंतर सुटण्याची शक्यता आहे.

श्रीलंका दौऱ्यातील टी२० मालिकेतील सामने अनुक्रमे २७, २८ आणि ३० जुलै दरम्यान खेळवले जाणार आहे. तसेच वनडे मालिकेतील सामने अनुक्रमे २, ४ आणि ७ ऑगस्ट दरम्यान खेळवले जाण्याची शक्यता आहे.