India vs Bangladesh, 2nd Test: शुक्रवारपासून भारत विरुद्ध बांगलादेश संघात कसोटी मालिकेतील दुसरा सामना कानपूरमधील ग्रीन पार्क स्टेडियमवर सुरू झाला आहे. मात्र या सामन्याच्या पहिल्या दिवसापासून या सामन्यावर पावसाचे सावट आहे. शनिवारी तर संपूर्ण दिवसात एकाही चेंडूचा खेळ होऊ शकला नव्हता.

आता रविवारीही पावसामुळे मैदान ओले असल्याने निर्धारित वेळेत सामना सुरू होऊ शकलेला नाही. आता बीसीसीआयने दिलेल्या अपडेट्सनुसार दुपारी १२ वाजता सामनाधिकारी मैदान खेळण्यासाठी योग्य आहे की नाही ही तपासणी करतील आणि त्यानंतर पुढील अपडेट्स देतील.

या सामन्यात पहिल्या दिवशी पावसामुळे ३५ षटकांचाच खेळ होऊ शकला होता. त्यानंतर दुसऱ्या दिवशी तर संपूर्ण दिवसाचा खेळ रद्द करण्यात आला. दरम्यान, पहिल्या दिवशीही पावसामुळे नाणेफेकही उशीरा झाली होती. त्यावेळी भारताने नाणेफेक जिंकून प्रथम गोलंदाजी करण्याचा निर्णय घेतला होता.

बांगलादेशकडून झाकिर हसन आणि शादमन इस्लाम यांनी सलामीला फलंदाजीला उतरत सुरूवात संयमी केली होती. पण आकाश दीपने आधी २४ चेंडूत शून्य धावेवर असलेल्या झाकिरला बाद केले.

त्यानंतर त्याने ३६ चेंडूत २४ धावा करणाऱ्या शादमन इस्लामला पायचीत पकडलेय पण त्यानंतरही मोमिनुल हक आणि कर्णधार नजमुल हुसैन शांतो यांनी अर्धशतकी भागीदारी केली. पण अखेर शांतोला आर अश्विनने पायचीत केले. शांतोने ५७ चेंडूत ३१ धावांची खेळी केली.

यानंतर मोमिनुलला साथ देण्यासाठी मुश्फिकुर रहिम आला होता. ते फलंदाजी करत असतानाच कमी सूर्यप्रकाशामुळे सामना थांबवण्यात आला. त्यानंतर लगेचच पावसाने जोरही पकडला. त्यामुळे पहिल्या दिवसाचा खेळही ३५ षटकांनंतर थांबण्यात आला.

दरम्यान, या मालिकेतील पहिला सामना भारताने २८० धावांनी जिंकला होता. त्यामुळे भारतीय संघ सध्या या मालिकेत १-० ने आघाडीवर आहे. आता भारताने जर दुसरा सामना जिंकला किंवा अनिर्णित राखला, तरी ते मालिका जिंकतील.तसेच बांगलादेशने जर हा सामना जिंकला, तर मालिका बरोबरीत सुटेल.