IPL Retention 2025-2027 : भारतीय नियामक मंडळाने ( BCCI ) आज इंडियन प्रीमिअर लीग २०२५ ते २०२७ साठी काही नियम जाहीर केले आहेत. यामध्ये फ्रँचायझी ६ खेळाडूंना कायम ठेवू शकतात, यात जास्तीत जास्त २ अनकॅप्ड खेळाडूंना कायम राहतील. बीसीसीआयने जाहीर केलेल्या घोषणेतील सातवा नियम हा MS Dhoni साठी खूप महत्त्वाचा आहे. यात आंतरराष्ट्रीय क्रिकेटमधून निवृत्ती झालेल्या खेळाडूला अनकॅप्ड म्हणून फ्रँचायझी संघात ठेवू शकते. याशिवाय परदेशी खेळाडूंसाठी काही कठोर नियम घेतले गेले आहेत.

बीसीसीआयने जाहीर केलेले ८ महत्त्वाचे नियम...

• आयपीएल फ्रँचायझी एकूण ६ खेळाडूंना रिटेन म्हणजेच संघात कायम ठेवू शकतात. हे एकतर रिटेन्शनद्वारे किंवा राईट टू मॅच (RTM) पर्यायाचा वापर करून असू शकतात.

• ६ रिटेन्शन्स / RTM मध्ये जास्तीत जास्त ५ कॅप्ड खेळाडू (भारतीय आणि परदेशी) आणि जास्तीत जास्त २ अनकॅप्ड खेळाडू असू शकतात.

• IPL 2025 साठी फ्रँचायझींसाठी लिलाव पर्सची किंमत १२० कोटी ठेवण्यात आली आहे. एकूण पगाराच्या कॅपमध्ये आता लिलाव पर्स, वाढीव वेतन आणि सामना शुल्क यांचा समावेश असेल. २०२४ मध्ये एकूण वेतन कॅप ( लिलाव पर्स + वाढीव कामगिरी वेतन ) ११० कोटी होते, ते आता १४६ कोटी (२०२५), १५१ कोटी (२०२६) आणि १५७ कोटी (२०२७) असे असतील.

• आयपीएलच्या इतिहासात प्रथमच मॅच फी लागू करण्यात आली आहे. प्लेइंग इलेव्हनमध्ये खेळणाऱ्या (इम्पॅक्ट प्लेअरसह) खेळाडूला ७.५ लाख प्रति सामना फी मिळेल. ही त्याच्या कराराच्या रकमेव्यतिरिक्त असेल.

• परदेशी खेळाडूला मेगा ऑक्शनसाठी नोंदणी करावी लागेल. नोंदणी न केल्यास तो पुढील वर्षी होणाऱ्या लिलावासाठी अपात्र ठरेल.

• लिलावात नोंदणी केल्यानंतर खेळाडूची निवड झाली आणि त्याने पर्व सुरू होण्यापूर्वी माघार घेईल, तर त्याला २ पर्व लीगमध्ये भाग घेण्यास आणि खेळाडूंच्या लिलावात नाव नोंदवण्यास बंदी घालण्यात येईल.

• भारतीय खेळाडू मागील पाच कॅलेंडर वर्षांत आंतरराष्ट्रीय क्रिकेट खेळला नसेल तर तो कॅप्ड भारतीय खेळाडू अनकॅप्ड होईल. हे फक्त भारतीय खेळाडूंसाठी लागू असेल.

• २०२५-२०२७ सायकलसाठी इम्पॅक्ट प्लेयर नियम कायम राहिल.