Irani Cup 2024, Mumbai vs Rest of India, 1st Day: इराणी कप २०२४ स्पर्धेचा सामना मंगळवारपासून लखनौमध्ये सुरु झाला आहे. या सामन्यात २०२३-२४ रणजी ट्रॉफी विजेता मुंबई संघ शेष भारत संघाविरुद्ध खेळत आहे.

या सामन्यात कर्णधार अजिंक्य रहाणेच्या शानदार खेळाच्या जोरावर पहिल्या दिवस अखेर मुंबई संघाने ६८ षटकात ४ बाद २३७ धावा केल्या आहेत.

एकाना क्रिकेट स्टेडियमवर होत असलेल्या या सामन्यात शेष भारत संघाचा कर्णधार ऋतुराज गायकवाडने नाणेफेक जिंकली आणि प्रथम गोलंदाजी करण्याचा निर्णय घेतला. त्यामुळे प्रथम फलंदाजीसाठी उतरलेल्या मुंबई संघाकडून पृथ्वी शॉ आणि आयुष म्हात्रे सलामीला फलंदाजीला उतरले.

मात्र सुरुवातीलाच शेष भारतीय संघाचा वेगवान गोलंदाज मुकेश कुमारने मुंबईला मोठे धक्के दिले. त्याने पृथ्वी शॉ याला ४ धावांवर बाद केले, तर आयुष म्हात्रेला १९ धावांवर माघारी धाडले. हार्दिक तोमरेही भोपळाही न फोडता बाद झाला. त्यामुळे एका क्षणी मुंबईची अवस्था ३ बाद ३७ धावा अशी झाली होती.

पण यानंतर कर्णधार अजिंक्य रहाणे आणि श्रेयस अय्यर या अनुभवी खेळाडूंनी मुंबईचा डाव सावरला. त्यांनी शतकी भागीदारी करताना त्यांची अर्धशतकेही पूर्ण केली. पण त्यांची १०२ धावांची भागीदारी यश दयालने श्रेयस अय्यरला बाद करत तोडली. श्रेयसने ८४ चेंडूत ५७ धावांची खेळी केली.

तो बाद झाल्यानंतरही सर्फराज खानने संयमी खेळणाऱ्या अजिंक्य रहाणेला चांगली साथ दिली. त्यांनी चौथा दिवस संपेपर्यंत ९८ धावांची भागीदारी केली आहे. सर्फराजनेही अर्धशतक केले आहे. तसेच रहाणे आता शतकाच्या उंबरठ्यावर आहे.

त्याने आता सामन्याच्या दुसऱ्या दिवशी शतक केले, तर हे त्याचे प्रथम श्रेणी क्रिकेटमधील ४१ वे शतक ठरेल. चौथ्या दिवस अखेर अजिंक्य रहाणे १९७ चेंडूत ६ चौकार आणि १ षटकारासह नाबाद ८६ धावा केल्या. सर्फराज खानने ८८ चेंडूत ५४ धावांची नाबाद खेळी केली.

शेष भारत संघाकडून मुकेश कुमारने ३ विकेट्स घेतल्या. तसेच यश दयालने १ विकेट घेतली.