T20 World Cup 2024 Australia : टी-20 वर्ल्ड कप 2024 चे वेळापत्रक जाहीर करण्यात आले आहे. अमेरिका आणि वेस्ट इंडिज येथे होणाऱ्या या स्पर्धेला 1 जूनपासून सुरुवात होणार आहे. या स्पर्धेसाठी सर्व संघांनी तयारी सुरू केली आहे.

मात्र, ऑस्ट्रेलियाच्या कर्णधारपदाबाबत अद्याप निर्णय झालेला नाही. खरं तर, ॲरॉन फिंचच्या राजीनाम्यानंतर ऑस्ट्रेलियाच्या टी-20 संघाचे नेतृत्व मिचेल मार्शकडे होते, तर पॅट कमिन्सने भारतात खेळल्या गेलेल्या एकदिवसीय वर्ल्ड कप 2023 मध्ये संघाला विजय मिळवून दिला होता.

दरम्यान, ऑस्ट्रेलियन संघाचे प्रशिक्षक अँड्र्यू मॅकडोनाल्ड यांनी आगामी वर्ल्ड कपसाठी मिचेल मार्शचे समर्थन केले आहे. मीडिया रिपोर्ट्सनुसार, स्टार अष्टपैलू मिचेल मार्शला वर्ल्ड कप स्पर्धेत संघाचे नेतृत्व करण्याची जबाबदारी दिली जाऊ शकते. नुकत्याच झालेल्या वेस्ट इंडिज आणि न्यूझीलंडविरुद्धच्या मालिकेत मार्शने संघाचे नेतृत्व केले होते.

आता एक अहवाल समोर आला आहे, ज्यामध्ये संघाच्या प्रशिक्षकाने मिचेल मार्शचे कौतुक केले आहे. अँड्र्यू मॅकडोनाल्डने अहवालात म्हटले आहे की, "मार्श ज्याप्रकारे टी-20 संघासोबत काम करत आहेत त्यावरून आम्ही समाधानी आहोत. आमचा विश्वास आहे की तो वर्ल्ड कपमध्ये चांगला कर्णधार होईल, आणि आता ती वेळ आली आहे.

मिचेल मार्शने 54 टी-20 आंतरराष्ट्रीय सामन्यांमध्ये 1432 धावा केल्या आणि 17 विकेट घेतल्या आहेत. ऑस्ट्रेलियाचा माजी कर्णधार रिकी पाँटिंगनेही मिचेल मार्शचे समर्थन केले आहे. तो म्हणाला, "मला वाटते की तो टी-20 कर्णधार असला पाहिजे. तो यासाठी पात्र आहे. तो एक खेळाडू म्हणून खूप परिपक्व झाला आहे. तो नक्कीच एक कर्णधार आहे.