IPL 2024 : आयपीएल 2024 सुरू व्हायला अजून एक महिना बाकी आहे. पण त्याआधी 2022 चा चॅम्पियन संघ आणि 2023 च्या उपविजेत्या गुजरात टायटन्सला मोठा धक्का बसला आहे. वृत्तसंस्था पीटीआयने बीसीसीआयच्या सूत्राचा हवाला देत सांगितले की, दुखापतीमुळे मोहम्मद शमी संपूर्ण आयपीएल हंगामातून बाहेर पडला आहे. त्याच्यावर ब्रिटनमध्ये शस्त्रक्रियाही होणार आहे.

गेल्या वर्षीच्या एकदिवसीय वर्ल्ड कप स्पर्धेनंतर मोहम्मद शमी खेळताना दिसत नाही. शमीने 2023 च्या वर्ल्ड कपमध्ये सर्वाधिक 24 विकेट घेतल्या होत्या. त्याला नुकतेच अर्जुन पुरस्काराने सन्मानित करण्यात आले आहे. शमीने आपल्या कारकिर्दीत आतापर्यंत 229 कसोटी, 195 एकदिवसीय आणि 24 टी-20 विकेट्स घेतल्या आहेत.

दुखापतीमुळे त्याची दक्षिण आफ्रिका दौऱ्यासाठीही निवड झाली नाही. त्यानंतर तो सध्याच्या इंग्लंडविरुद्धच्या कसोटी मालिकेतूनही बाहेर झाला होता. आयपीएलनंतर लगेचच टी-20 वर्ल्ड कप होणार आहे आणि आता त्यात शमीच्या खेळण्याबाबत साशंकता आहे. मात्र, त्यासाठी अजून तीन महिने बाकी आहेत.

मोहम्मद शमी 2022 पासून गुजरात टायटन्सकडून खेळत आहे आणि दोन्ही हंगामात संघाला अंतिम फेरी गाठण्यात महत्त्वाची भूमिका बजावली. आयपीएल 2022 मध्ये शमीने 16 सामन्यांमध्ये 20 विकेट घेतल्या आणि सर्वाधिक बळी घेणारा सहाव्या क्रमांकावर होता. तर 2023 मध्ये शमीने 17 सामन्यात 28 विकेट घेतल्या होत्या.

गेल्या मोसमात तो सर्वाधिक बळी घेणारा गोलंदाज होता. शमीच्या गैरहजेरीमुळे गुजरात संघांचे टेन्शन वाढले आहे. हार्दिकच्या जागी शुभमन गिलची या मोसमासाठी कर्णधारपदी नियुक्ती करण्यात आली आहे. त्याचवेळी, टीम लवकरच शमीच्या बदलीची घोषणा करू शकते.