Pakistan vs England 2nd Test Kamran Ghulam Century : पाकिस्तानने दुसऱ्या कसोटीच्या पहिल्या दिवशी इंग्लंडच्या गोलंदाजांना चांगले उत्तर दिले आहे. पहिल्या कसोटीत डावाने पराभव पत्करावा लागल्यामुळे पाकिस्तानच्या संघावर चौफेर टीका झाली होती. संघातील सीनियर्स खेळाडूंचा फॉर्म हा चिंतेचा विषय निवड समितीने या खेळाडूंना संघाबाहेर करून सोडवला. त्यामुळेच काही नवीन चेहरे दुसऱ्या कसोटीत दिसले आणि तब्बल १२ वर्षांनंतर एका खेळाडूला कसोटीत पदार्पणाची संधी मिळाली.

पाकिस्तानने नाणेफेक जिंकून प्रथम फलंदाजीचा निर्णय घेतला. सलामीवीर अब्दुल्ला शफिक ( ७) व कर्णधार शान मसूद ( ३) यांना जॅक लिचने स्वस्तात बाद केले. इंग्लंडने सुरुवातीच्या षटकात फिरकीपटूला आणून पाकिस्तानला आश्चर्याचा धक्का दिला. इंग्लंडच्या संघातही मॅथ्यू पॉट्स व बेन स्टोक्स यांचे पुनरागमन झाले. १९ धावांत २ विकेट्स गमावल्यानंतर सईस आयूब व पदार्पणवीर कामरान गुलाम यांनी तिसऱ्या विकेटसाठी १४९ धावांची भागीदारी करून पाकिस्तानचा डाव सावरला. पॉट्सने ही जोडी तोडली. आयूब १६० चेंडूंत ७ चौकारांच्या मदतीने ७७ धावांवर स्टोक्सच्या हाती झेल देऊन परतला.

ब्रेडन कार्सने पाकिस्तानला चौथा धक्का देताना सौद शकिलची ( ४) विकेट घेतली. एका बाजूने कामरान गुलाम खिंड लढवत राहिला. त्याने १९३ चेंडूंत ९ चौकार व १ षटकारांसह १०२ धावांची खेळी केली. त्याला मोहम्मद रिझवान साथ देतोय आणि दोघांनी संघाला ७५ षटकांत ४ बाद २२३ धावांपर्यंत पोहोचवले आहे.

कोण आहे कामरान गुलाम?

• कामरानने २०१३ मध्ये १७ वर्षांचा असताना पाकिस्तानकडून वन डे क्रिकेटमध्ये पदार्पण केले. त्याला एकच सामना खेळण्याची संधी मिळाली. २०१३ मध्ये पाकिस्तानच्या १९ वर्षांखालील संघाकडून वर्ल्ड कप फायनलही खेळला होता. त्यानंतर १० वर्षांनी त्याला सीनियर्स संघाकडून वन डे क्रिकेटमध्ये पदार्पणाची संधी मिळाली आणि आज त्याने कसोटी क्रिकेटमध्ये पदार्पण केले.

• त्याने ५९ प्रथम श्रेणी क्रिकेटमध्ये ४३७७ धावा केल्या आहेत. त्यात १६ शतकं व २० अर्धशतकांचा समावेश आहे. ९४ लिस्ट ए क्रिकेटमध्ये त्याच्या नावावर ३३४४ धावा आहेत, तर ७३ ट्वेंटी-२० सामन्यांत १५१० धावा त्याने केल्या आहेत.