Dhawal Kulkarni News: गुरुवारी (14 मार्च) मुंबई संघाने रणजी ट्रॉफी 2023-24 स्पर्धेच्या विजेतेपदावर नाव कोरले आहे. वानखेडे स्टेडियमवर झालेल्या अंतिम सामन्यात मुंबईने विदर्भाला 169 धावांनी पराभूत करत 42 व्यांदा रणजी ट्रॉफीवर नाव कोरले.

दरम्यान, हा सामना मुंबईचा गोलंदाज धवल कुलकर्णीचा अखेरचा सामना होता. त्याने या सामन्यानंतर निवृत्ती घेतली आहे. 36 वर्षीय धवल 16 वर्षे मुंबईकडून खेळला.

त्याच्या निवृत्तीबद्दल मुंबई संघातील खेळाडूंनी त्याला मराठीतून शुभेच्छा दिल्या आहेत. याचा व्हिडिओही बीसीसीआयने सोशल मीडियावर शेअर केला आहे. या व्हिडिओमध्ये श्रेयस अय्यर, पृथ्वी शॉ, शार्दुल ठाकूर आणि शम्स मुलानी धवलला शुभेच्छा देताना दिसत आहेत.

या व्हिडिओमध्ये दिसते की श्रेयस म्हणाला, 'आम्ही तुम्हाला मिस करू. तुम्ही संघाचा महत्त्वाचा भाग होता. तुम्हाला सेकंड इनिंगसाठी शुभेच्छा. तुम्ही यापुढे जे कराल, ते मनापासून कराल.'

त्यानंतर शार्दुल म्हणाला, 'धवल आम्ही तुम्हाला खुप मिस करू. तुझ्याबरोबर 12 वर्षे एकत्र खेळून मजा आली. पुढील वाटचालीसाठी शुभेच्छा.' तसेच शॉने देखील शुभेच्छा देताना म्हटले, 'तुम्ही मुंबईसाठी आणि भारतासाठी जे काही केले, त्याबद्दल आभार. तुमच्या सेकंड इनिंगसाठी शुभेच्छा.'

व्हिडिओच्या शेवटी शम्स मुलानी म्हणाला, 'मुंबई क्रिकेटमध्ये खुप कुलकर्णी येतील. पण तुमच्यासारखा कुलकर्णी नाही येणार. तुम्हाला खुप शुभेच्छा.'

दरम्यान रणजी ट्रॉफीच्या अंतिम सामन्यात धवल कुलकर्णीने पहिल्या डावात 3 महत्त्वाच्या विकेट्स घेतल्या होत्या. त्यानंतर त्याने दुसऱ्या डावात विदर्भाची शेवटी विकेट घेत मुंबईच्या विजयावर शिक्कामोर्तब केले होते.

धवलने त्याच्या 16 वर्षांच्या कारकिर्दीत प्रथम श्रेणी क्रिकेटमध्ये 95 सामने खेळले. यामध्ये त्याने 281 विकेट्स घेतल्या. त्याचबरोबर त्याने 130 लिस्ट ए सामने खेळले असून 223 विकेट्स घेतल्या. त्याचबरोबर त्याने 162 टी20 सामने खेळताना 154 विकेट्स घेतल्या.

त्याने भारतीय संघाचे 12 वनडे आणि 2 टी20 सामन्यांतही प्रतिनिधित्व केले.