Sarfaraz Khan Hundred in Irani Cup: इराणी कप २०२४ स्पर्धेचा सामना मंगळवारी (१ ऑक्टोबर) सुरू झाला आहे. लखनौमधील एकाना क्रिकेट स्टेडियमवर होत असलेल्या या सामन्यात २०२३-२४ रणजी ट्रॉफी विजेता मुंबई संघ विरुद्ध शेष भारत संघ खेळत आहेत.

पहिल्याच डावात मुंबईची खडूस फलंदाजी पाहायला मिळाली आहे. कर्णधार अजिंक्य रहाणे आणि सर्फराज खान यांनी शानदार खेळी केली. याशिवाय श्रेयस अय्यरनेही अर्धशतकी खेळी केली. मात्र शेष भारत संघाचा कर्णधार ऋतुराज गायकवाडने चपळाईने घेतलेल्या DRS मुळे रहाणेचं शतक अगदी थोडक्यात हुकले.

या सामन्यात प्रथम फलंदाजी करणाऱ्या मुंबईने पहिल्या डावात ३७ धावांवर ३ विकेट्स गमावल्यानंतर रहाणे आणि श्रेयस अय्यर यांनी डाव सावरला होता. त्यांनी १०२ धावांची भागीदारी केली. पण अय्यर ५७ धावांवर बाद झाला.

परंतु, त्यानंतरही सर्फराजने शानदार साथ रहाणेला दिली. त्यांच्या भागीदारीमुळे पहिल्या दिवस अखेर मुंबईने ६८ षटकात ४ बाद २३७ धावा केल्या होत्या. दुसऱ्या दिवशी म्हणजे बुधवारीही रहाणे आणि सर्फराजने चांगली सुरुवात केलेली. मात्र ७९ व्या षटकात रहाणे बाद झाला. त्यामुळे त्यांची १३१ धावांची भागीदारी तुटली.

झाले असे की यश दयाल गोलंदाजी करत होता. त्याने ७९ व्या षटकातील तिसरा चेंडू बाऊंसर टाकला. त्यावर शॉट खेळताना रहाणे चुकला. त्यामुळे चेंडू त्याच्या ग्लव्ह्जला स्पर्श करत यष्टीरक्षक ध्रुव जुरेलच्या हातात गेला. मात्र आधी पंचांनी तो नाबाद असल्याचा निर्णय दिला.

मात्र फार वेळही न घेता ऋतुराजने लगेचच DRS ची मागणी केली. रिप्लेमध्ये रहाणेच्या ग्लव्ह्जला चेंडूचा स्पर्श झाल्याचे दिसले. त्यामुळे पंचांना आपला निर्णय बदलावा लागला आणि रहाणेला बाद द्यावे लागले. रहाणे बाद झाला, तेव्हा तो २३४ चेंडूत ९७ धावांवर खेळत होता. त्याच्या या खेळीत त्याने ७ चौकार आणि १ षटकार मारला.

तो बाद झाला असला तरी तनुष कोटियनने सर्फराजची चांगली साथ दिली. त्याच्यातही अर्धशतकी भागीदारी झाली. या भागीदारीदरम्यान सर्फराजने शतक पूर्ण केले. त्याचे हे प्रथम श्रेणीमधील ५१ व्या सामन्यातील १५ वे शतक ठरले. त्याच्या या खेळीमुळे मुंबईने साधारण ९० षटकांमध्ये ३०० धावांचा टप्पा ओलांडला होता.