Sanath Jayasuriya Sri Lanka Coach : भारताविरुद्धच्या आगामी टी-20 आणि एकदिवसीय मालिकेपूर्वी श्रीलंकेने मोठा निर्णय घेतला आहे. श्रीलंकेने संघाच्या मुख्य प्रशिक्षकपदी सनथ जयसूर्याची नियुक्ती केली आहे. ख्रिस सिल्व्हरवुडने टी-20 वर्ल्ड कपमधील लाजिरवाण्या कामगिरीनंतर आपल्या पदाचा राजीनामा दिला. यानंतर आता जयसूर्याला संघाचे अंतरिम प्रशिक्षक बनवण्यात आले आहे.

2024 च्या टी-20 वर्ल्ड कपमध्ये श्रीलंकेच्या संघाची कामगिरी चांगली राहिली नव्हती. संघाने गट टप्प्यात एकूण 4 सामने खेळले, त्यापैकी फक्त 1 सामना जिंकला आणि 2 सामने गमावले. पावसामुळे एका सामन्याचा निकाल लागला नाही. यानंतर मुख्य प्रशिक्षक ख्रिस सिल्व्हरवुड यांनी आपल्या पदाचा राजीनामा दिला. कुटुंबाचा हवाला देत त्याने श्रीलंकेच्या संघाचे प्रशिक्षकपद सोडण्याची घोषणा केली होती. यापूर्वी महेला जयवर्धने यांनीही क्रिकेट सल्लागार पदाचा राजीनामा दिला होता.

या दोन दिग्गजांच्या राजीनाम्यानंतर आता जयसूर्याकडे अंतरिम प्रशिक्षकपदाची जबाबदारी देण्यात आली आहे. टी-20 वर्ल्ड कपमध्ये सल्लागार म्हणूनही तो संघासोबत होता आणि त्यामुळेच त्याला संघाचे प्रशिक्षक बनवण्यात आले आहे. श्रीलंकेचा संघ नवीन मुख्य प्रशिक्षकाचा शोध सुरू ठेवणार आहे.