नवी दिल्ली : यंदाच्या रणजी क्रिकेट करंडकातील मोसमात बाद फेरीपासून दूर झालेल्या महाराष्ट्राच्या संघाचा पाय खोलात गेला आहे. सेना दल संघाविरुद्धच्या ‘अ’ गटातील अखेरच्या साखळी फेरीच्या लढतीत महाराष्ट्र संघ बॅकफूटवर फेकला गेला आहे.

महाराष्ट्राच्या संघाला पहिल्या डावात २२५ धावांवर गुंडाळल्यानंतर सेना दल संघाने तिसऱ्या दिवसअखेरीस ९ बाद ४३० धावा केल्यामुळे आता त्यांच्याकडे २०५ धावांची आघाडी आहे. या लढतीचा अखेरचा दिवस उद्या (ता. १९) असणार आहे. सेना दल संघाने ४ बाद २१७ या धावसंख्येवरून रविवारी पुढे खेळायला सुरुवात केली. रजत पलिवाल व नकुल शर्मा या जोडीने १०८ धावांची भागीदारी करताना सेना दलासाठी मोलाची कामगिरी बजावली.

हितेश वाळुंजच्या गोलंदाजीवर रजत ५१ धावांवर बाद झाला. या खेळीत त्याने सात चौकार मारले. त्यानंतर नकुल याने शतकाकडे कूच केली, पण कौशल तांबेच्या गोलंदाजीवर तो बाद झाला. ८७ धावांच्या खेळीत त्याने ८ चौकार व ३ षटकार मारले. सेना दलाच्या तळाच्या फलंदाजांनी महाराष्ट्राच्या गोलंदाजांचे आव्हान समर्थपणे थोपवून लावले.

पुल्कीत नारंग याने २७ धावांची, अर्जुन शर्माने नाबाद ४३ धावांची, पूनम पुनियाने २६ धावांची खेळी केली. सेना दल संघाने तिसऱ्या दिवसअखेरीस ९ बाद ४३० धावा फटकावल्या. तरणजीत ढिल्लो याने १२९ धावा देत चार फलंदाजांना पॅव्हेलियनचा रस्ता दाखवला.

संक्षिप्त धावफलक : महाराष्ट्र- पहिला डाव २२५ धावा, वि. सेना दल - पहिला डाव ९ बाद ४३० धावा (शुभम रोहिला ७२, रजत पलिवाल ५१, नकुल शर्मा ८७, तरणजीत ढिल्लो ४/१२९).