Pakistan Team Coach : ऑस्ट्रेलियाचा माजी अष्टपैलू खेळाडू शेन वॉटसन पाकिस्तानचा मुख्य प्रशिक्षक होण्याच्या शर्यतीतून बाहेर पडला आहे. वॉटसनला पाकिस्तानी संघाचे मुख्य प्रशिक्षक बनवले जाऊ शकते, अशा बातम्या याआधी मीडिया रिपोर्ट्समध्ये आल्या होत्या. मात्र आता या बातम्यांना पूर्णविराम लागला आहे. यासोबत वेस्ट इंडिजचा माजी कर्णधार डॅरेन सॅमी यांनी पाकिस्तानचे मुख्य प्रशिक्षक बनण्याची ऑफर नाकारली आहे. त्यामुळे पाकिस्तान क्रिकेट बोर्डाचा (PBB) परदेशी कोचचा शोध अजूनही पूर्ण झालेला नाही.

वेस्ट इंडिजचा माजी कर्णधार डॅरेन सॅमीने पीसीबीला सांगितले की, मर्यादित षटकांच्या संघाचा मुख्य प्रशिक्षक म्हणून तो आधीच वेस्ट इंडिज बोर्डाशी करारबद्ध आहे. तर दुसरीकडे वॉटसन आपल्या प्रस्तावित पॅकेजमुळे नाराज असल्याची चर्चा पाकिस्तानी मीडियात आहे.

पीसीबीची ऑफर नाकारल्यानंतर वॉटसन शनिवारी रात्री घरी परतला. या घडामोडीची माहिती असलेल्या एका सूत्राने सांगितले की, पीसीबीच्या वरिष्ठ अधिकाऱ्यांनी पीएसएल सामन्यांदरम्यान वॉटसनशी कराचीमध्ये दीर्घ चर्चा केली आणि त्याला मुख्य प्रशिक्षकपदाची ऑफर दिली.

तो म्हणाला की, 'वॉटसनने सुरुवातीला रस्य दाखवला होता आणि ऑफर स्वीकारण्यासाठी काही आर्थिक आणि इतर अटी ठेवल्या होत्या. बोर्डाने वॉटसनच्या आर्थिक मागण्या कमी प्रमाणात मान्य केल्यानंतर, त्याच्या प्रस्तावित पॅकेजचे तपशील पाकिस्तान मीडिया आणि सोशल मीडियावर लीक झाल्यामुळे माजी खेळाडू नाराज झाला.

आयपीएल (इंडियन प्रीमियर लीग) आणि मेजर क्रिकेट लीग (यूएसए) मध्ये समालोचक म्हणून पूर्वीच्या वचनबद्धतेचा उल्लेख करत वॉटसनने कोचची ऑफर नाकारली. यासोबतच त्याला सिडनीमध्ये आपल्या कुटुंबाला अधिक वेळ द्यायचा आहे.

पाकिस्तानी मीडियानुसार, पीसीबीने वॉटसनला वार्षिक दोन दशलक्ष डॉलर्स (सुमारे 16.60 कोटी भारतीय रुपये) देण्याचे मान्य केले होते. आता बोर्ड 14 एप्रिलपासून न्यूझीलंडविरुद्ध सुरू होणाऱ्या पाच सामन्यांच्या टी-20 आंतरराष्ट्रीय मालिकेसाठी देशांतर्गत प्रशिक्षकाची नियुक्ती करू शकते.