Maharashtra vs Jammu & Kashmir: कालपासून रणजी ट्रॉफी स्पर्धेला सुरूवात झाली असून महाराष्ट्र आपला पहिला सामना जम्मू आणि काश्मीर विरूद्ध खेळत आहे. जम्मू आणि काश्मीर संघ पहिल्या डावात ४४९ धावांवरती खेळत आहे तर जम्मूचा फलंदाज शुभम खजुरीयाने महाराष्ट्रातील गोलंदाजांना नमवले आहे. सलामीसाठी आलेल्या शुभमने डावात दणदणीत द्विशतक झळकावले. आत्तापर्यंत महाराष्ट्राने जम्मू आणि काश्मीर संघाचे ५ फलंदाज बाद केले. परंतु सलामीवीर शुभमला रोखण्यात महाराष्ट्राच्या गोलंदाजांना यश आले नाही.

नाणेफेक जिंकून महाराष्ट्राने प्रथम गोलंदाजीचा निर्णय घेतला आणि पहिल्याच षटकाच्या तिसऱ्याच चेंडूवर सलामीवीर अभीनव पुरीला बाद करून महाराष्ट्राने जम्मू आणि काश्मीर संघाला पहिला धक्का दिला. नंतरच्या चारही खेळाडूंना महाराष्ट्राच्या गोलंदाजांनी माघारी पाठवले. परंतु शुभम खजुरीयाने संघाची एक बाजू लावून धरली आणि खेळत राहीला. शुभमला या खेळीदरम्यान ५ खेळाडूंची साथ मिळाली. ज्यामध्ये शुभम शुभम पुंडीर (३७), कर्णधार पारस डोग्रा (३०), अब्दुल शामद (२३), साहिल लोत्रा (१८) यांनी योगदान दिले. तर शिवांश शर्मा अर्धशतक झळकावून ७२ धावांवर नाबाद आहे.

शुभम ३५२ चेंडूत २५५ धावांवर नाबाद आहे. या खेळीदरम्यान त्याने २९ चौकार व ८ षटकार ठोकले. दुसऱ्या दिवसाच्या मध्यंतरापर्यंत जम्मू आणि काश्मीर संघाने ५ विकेट्स गमावत तब्बल ४४९ धावा उभारल्या आहेत.

मुंबईविरूद्ध बरोडा

गतविजेता मुंबई संघ आपला पहिला सामना बरोड्याविरूद्ध खेळत असून बरोडा संघाने पहिल्या डावात २९० धावा उभारल्या आहेत. प्रत्युत्तरात मुंबई संघ ५ विकेट्स गमावत १६३ धावांवर खेळत आहे. सलामीवीर पृथ्वी शॉ अवघ्या ७ धावा करून माघारी परतला, तर दुसरा सलामीवीर आयुष म्हात्रेने (५२) अर्धशतक झळकाले. यष्टीरक्षक हार्दीक तामोरेने (४०) व कर्णधार अजिंक्य रहाणेने (२९) धावांचे योगदान दिले. परंतु श्रेयश अय्यरच्या खात्यात मात्र भोपळा पडला. तर, सिद्धेश लाड(३) व शम्स मुलानी (१६) धावांवर नाबाद आहे.