Suryakumar Yadav on India's T20I Captaincy: जुलै महिन्याच्या अखेरीस भारतीय क्रिकेट संघ श्रीलंका दौऱ्यावर जाणार आहे. या दौऱ्यात भारतीय संघाला तीन टी२० आणि तीन वनडे मालिका खेळायची आहे. या दौऱ्यासाठी भारतीय संघाची घोषणा देखील गुरुवारी (१८ जुलै) बीसीसीआयच्या निवड समितीने केली.

या निवडीवेळी काही आश्चर्यकारक निर्णय घेतल्याचेही दिसून आले. भारताच्या टी२० संघाच्या कर्णधारपदी सूर्यकुमार यादवला नियुक्त करण्यात आले. यानंतर सूर्यकुमारने आता शुक्रवारी एक खास पोस्ट शेअर केली आहे.

सूर्यकुमारने लिहिले, 'तुम्ही दिलेल्या प्रेम, पाठिंबा आणि शुभेच्छांबद्दल खूप खूप आभार. मागील काही आठवडे स्वप्नवत होते आणि मी खरंच कृतज्ञ आहे. देशासाठी खेळणे ही भावना खूप खास आहे, ज्याचे वर्णन शब्दात वर्णन करता येणार नाही.'

'मला मिळालेली नवी भूमिका आपल्यासोबत मोठी जबाबदारी आणि उत्साह घेऊन आली आहे. मला यापुढेही तुमचा पाठिंबा आणि आशीर्वाद मिळतील अशी आशा आहे. ईश्वर महान आहे.'

सूर्यकुमार यादवला २०२६ टी२० वर्ल्ड कपपर्यंत टी२० संघाचे नेतृत्वपद देण्यात आल्याचं म्हटलं जातंय.

खरंतर गेल्याच महिन्यात भारताने टी२० वर्ल्ड कप २०२४ स्पर्धा जिंकल्यानंतर कर्णधार रोहित शर्माने आंतरराष्ट्रीय टी२० क्रिकेटमधून निवृत्ती घेतली होती. त्यानंतर भारताच्या टी२० संघाचा कर्णधार कोण होणार याची चर्चा गेल्या काही दिवसांपासून होती.

टी२० वर्ल्ड कपमध्ये हार्दिक भारतीय संघाचा उप-कर्णधार होता. त्यामुळे त्याला ही जबाबदारी मिळेल, अशी चर्चा होती. मात्र, आता निवड समितीने ही जबाबदारी सूर्यकुमार यादवच्या खांद्यावर सोपवली आहे. तसेच शुभमन गिल याला वनडे आणि टी२० संघांचा उप-कर्णधार करण्यात आले आहे.

सूर्यकुमार टी२० क्रमवारीत फलंदाजांच्या यादीत दुसऱ्या क्रमांकावर आहे. तसेच सूर्यकुमारने यापूर्वी प्रभारी कर्णधार म्हणून भारतीय संघाचे ७ टी२० सामन्यांमध्ये नेतृत्व केले असून त्यातील ५ सामन्यांत विजय मिळवला आहे, तर २ सामन्यांत पराभव पत्करला आहे.