2024 च्या टी-20 वर्ल्ड कप विजेतेपद पटकावल्याबद्दल भारतीय क्रिकेट नियामक मंडळाने टीम इंडियाला 125 कोटी रुपयांची बक्षीस रक्कम दिली होती. बीसीसीआयने ही बक्षीस रक्कम खेळाडू, सपोर्ट स्टाफ, प्रशिक्षक आणि निवडकर्त्यांसह 42 सदस्यांमध्ये वाटली. ज्यामध्ये सर्वात मोठा भाग टी-20 वर्ल्ड कपमधील 15 सदस्यीय संघाचा आहे. पण जेव्हा ही बक्षिसाची रक्कम वाटली जात होती, तेव्हा रोहित शर्माने असे काही केले जे सर्वांची मन जिंकेल.

एका मीडिया रिपोर्टनुसार, बक्षीस रकमेचे वाटणी करताना टीम इंडियाचा कर्णधार रोहित शर्मा सपोर्ट स्टाफला मोठा वाटा मिळावा यासाठी तो त्यांचा बोनस देण्यास तयार होता. वृत्तानुसार, भारतीय संघाच्या एका सपोर्ट स्टाफ सदस्याने खुलासा केला आहे की, जेव्हा 125 कोटी रुपयांची बक्षीस रक्कम वाटली गेली तेव्हा रोहित शर्माने आवाज उठवला आणि सपोर्ट स्टाफला एवढी कमी रक्कम मिळू नये असे सांगितले. यासाठी तो आपला बोनस देण्यासही तयार होता.

मिळालेल्या माहितीनुसार, बक्षीस रकमेपैकी सर्व 15 खेळाडूंना प्रत्येकी 5 कोटी रुपये मिळतील. याशिवाय टी-20 वर्ल्ड कप मुख्य प्रशिक्षक राहिलेला राहुल द्रविड, फलंदाजी प्रशिक्षक विक्रम राठोड, क्षेत्ररक्षण प्रशिक्षक टी. दिलीप आणि गोलंदाजी प्रशिक्षक पारस म्हांबरे यांना प्रत्येकी 2.5 कोटी रुपयांची बक्षीस रक्कम मिळणार आहे.

यापूर्वी राहुल द्रविडला 5 कोटी रुपये मिळणार होते, परंतु त्याला त्याच्या उर्वरित कोचिंग स्टाफप्रमाणेच बक्षिसाची रक्कम हवी आहे, त्यामुळे त्याने 5 कोटी रुपयांपैकी निम्मी म्हणजे 2.5 कोटी रुपये सोडून देण्याचा निर्णय घेतला आहे. आणि राखीव खेळाडूंना 1 कोटी रुपये मिळाले आहेत.