Tushar Deshpande Instagram Post: रविवारी (२१ जुलै) भारतभरात गुरूपौर्णिमा साजरी केली जात आहे. प्रत्येक व्यक्तीच्या आयुष्यात गुरूचे महत्त्वाचे स्थान असते.

गुरू पौर्णिमेच्या दिवशी याच गुरुप्रती आदरही व्यक्त केला जातो. त्यामुळे रविवारी अनेकजण गुरुपौर्णिमेच्या शुभेच्छा देताना दिसत आहेत. भारताचा वेगवान गोलंदाज तुषार देशपांडेनेही एक खास फोटो शेअर करत गुरुपौर्णिमेच्या शुभेच्छा दिल्या आहेत.

तुषारने त्याच्या इंस्टाग्राम स्टोरीवर त्याच्या वडिलांसह एमएस धोनीचा फोटो शेअर केला आहे. तसेच 'गुरू ब्रह्मा गुरू विष्णु, गुरु देवो महेश्वरा गुरु साक्षात परब्रह्म, तस्मै श्री गुरुवे नमः' हा श्लोकही त्याने लिहिला आहे. त्याची ही इंस्टाग्राम स्टोरी सध्या सोशल मीडियावर चर्चेत आहे.

तुषार आयपीएलमध्ये चेन्नई सुपर किंग्सकडून खेळतो. त्याला या संघाने २०२२ मध्ये २० लाखांच्या किंमतीत संघात घेतले होते. चेन्नईचा माजी कर्णधार असलेल्या एमएस धोनीने त्याला अनेकदा यादरम्यान मार्गदर्शन केले आहे. तुषारने अनेकदा त्याच्यातील सर्वोत्तम कामगिरी होण्यासाठी धोनीला श्रेय दिले आहे.

त्याने नुकतेच झिम्बाब्वेविरुद्धच्या टी२० मालिकेतून भारताकडून आंतरराष्ट्रीय क्रिकेटमध्ये पदार्पण केले होते. त्याने २ सामने खेळले असून २ विकेट्स घेतल्या आहेत. पण त्याला आगामी श्रीलंका दौऱ्यासाठी भारतीय संघात स्थान मिळवता आलेले नाही.

तुषारने आयपीएलमध्ये आत्तापर्यंत ३६ सामने खेळले असून ४२ विकेट्स घेतल्या आहेत. यातील ३१ सामन्यात ३९ विकेट्स त्याने चेन्नईकडून खेळताना घेतल्या आहेत.