Virat Kohli Record: भारत विरुद्ध बांगलादेश संघात गुरुवारपासून (१९ सप्टेंबर) कसोटी मालिकेतील पहिला सामना सुरू झाला आहे. एमए चिदंबरम स्टेडियम (चेपॉक) येथे हा सामना सुरू आहे. या सामन्यादरम्यान भारताचा स्टार फलंदाज विराट कोहलीने एका मोठ्या विक्रमाला गवसणी घातली आहे.

शुक्रवारी या सामन्याच्या दुसऱ्या दिवशी भारताच्या दुसऱ्या डावात विराट कोहली ३७ चेंडूत १७ धावा करून बाद झाला. तो पहिल्या डावातही ६ धावांवर बाद झाला होता. विराटला दुसऱ्या डावात मेहदी हसन मिराजने पायचीत केले.

विशेष म्हणजे मेहदी हसन मिराजने २० व्या षटकात टाकलेल्या चेंडूचा हलकासा स्पर्श विराटच्या बॅटला होऊन तो चेंडू त्याच्या पायावर आदळला होता.

मात्र बॅटला झालेला स्पर्श न जाणवल्याने बांगलादेशने केलेल्या अपीलवर अंपायरने त्याला बाद दिले आणि त्यानेही रिव्ह्यु न घेण्याचा निर्णय घेतला. त्यामुळे त्याला १७ धावांवर माघारी परतावे लागले. परंतु, नंतर रिप्लेमध्ये दिसले की विराटच्या बॅटला चेंडूचा स्पर्श झाला होता.

दरम्यान, विराटने १७ धावा केल्याने मायदेशात आंतरराष्ट्रीय क्रिकेट खेळताना १२ हजार धावांचा टप्पा पार केला आहे.

त्याने भारतात खेळताना २१९ आंतरराष्ट्रीय सामन्यांमध्ये २४३ डावात १२०१२ धावा केल्या आहेत. ज्यात ३८ शतके आणि ५९ अर्धशतके केली आहेत. तो मायदेशात आंतरराष्ट्रीय क्रिकेट खेळताना १२ हजार धावा करणारा जगातील पाचवाच खेळाडू आहे. यापूर्वी सचिन तेंडुलकर, रिकी पाँटिंग, जॅक कॅलिस आणि कुमार संगकारा यांनी असा पराक्रम केला आहे.

आंतरराष्ट्रीय क्रिकेटमध्ये मायदेशात सर्वाधिक धावा करणारे क्रिकेटर

• १४१९२ धावा - सचिन तेंडुलकर (३१३ डाव) - भारत

• १३११७ धावा - रिकी पाँटिंग (३०८ डाव)- ऑस्ट्रेलिया

• १२३०५ धावा - जॅक कॅलिस (२८२ डाव) - दक्षिण आफ्रिका

• १२०४३ धावा - कुमार संगकारा (२७० डाव) - श्रीलंका

• १२०१२ धावा - विराट कोहली (२४३ डाव) - भारत

सामन्यात भारताचे वर्चस्व

चेन्नई कसोटीत भारतीय संघाने पहिल्या डावात ९१.२ षटकात सर्वबाद ३७६ धावा केल्या. त्यानंतर बांगलादेशचा पहिला डाव ४७.१ षटकात १४९ धावांवरच संपला. त्यामुळे भारताला २२७ धावांची आघाडी मिळाली होती. भारताने दुसऱ्या डावात दुसऱ्या दिवस अखेर २३ षटकात ३ बाद ८१ धावा केल्या. त्यामुळे दुसऱ्या दिवस अखेर भारताकडे ३०८ धावांची आघाडी आहे.