Virat Kohli Interaction With PM Narendra Modi : पंतप्रधान नरेंद्र मोदी यांनी 4 जुलैला सकाळी विश्वविजेत्या भारतीय संघाची भेट घेतली. त्यावेळी पंतप्रधान नरेंद्र मोदी यांनी संघातील सर्व खेळाडूंशी संवाद साधला. यावेळी विराट कोहलीने देखील 'मन की बात' केली. दक्षिण आफ्रिकेविरूद्धच्या अंतिम सामन्यात विराट कोहलीला सामनावीराचा पुरस्कार देण्यात आला होता. त्याने 59 चेंडूत 76 धावांची दमदार खेळी केली.

दरम्यान, पंतप्रधान नरेंद्र मोदी यांनी विराटशी संवाद साधला त्यावेळी विराट म्हणाला की, 'सर्वात प्रथम तुम्ही आम्हाला इथं आमंत्रित केलं यासाठी आभारी आहे. हा दिवस माझ्या ह्रदयात कायम राहील. मी या स्पर्धेत फार काही योगदान देऊ शकलो नव्हतो. मी राहुल भाईला म्हणालो होतो की मी संघासोबत आणि स्वतःसोबतही न्याय करत नाहीये. मात्र त्यांनी मला सांगितले की ज्यावेळी संधी येईल त्यावेळी तू कामगिरी करशील अशी आशा मला आहे.'

विराट कोहली पुढे म्हणाला की, 'ज्यावेळी मी फायनलमध्ये रोहित शर्मासोबत फलंदाजीला गेलो. मी रोहितला म्हणालो देखील की मला स्वतःवर विश्वास नाहीये. मात्र मला सलग तीन चौकार मिळाले अन् मी त्याला म्हणालो की, हे काय होत आहे. एक दिवस मला एक धावही करता येत नाहीये. आता मला एकाच षटकात तीन चौकार मिळाले आहेत.'

विराट कोहलीने फायनलवेळी कशी फलंदाजी केली हे सांगितलं. तो म्हणाला की, 'ज्यावेळी आपल्या तीन विकेट्स गेल्या होत्या त्यावेळी मी संघासाठी जे काही गरजेचं ते करण्याचं ठरवलं. मला वाटलं की मला या परिस्थिती टाकण्यात आलं आहे. या भावना व्यक्त करणं सोपं नाही. काही गोष्टी घडायच्या असतात त्या आपल्या हातात नसतात.'